Ես ուրախ կլինեի, որ «Իմ քայլը» դատապարտեր այդպիսի գործելակերպը․ Նարինե Դիլբարյանը՝ պարգևատրումների մասին․ ՏԵՍԱՆՅՈՒԹ

Լեզվաբան Նարինե Դիլբարյանի համար ցանկալի է, որ մեր բանակը ղեկավարի հաջող կառավարիչ, որը տիրապետում է և՛ ճգնաժամային կառավարման, և՛ կառավարման բոլոր տեսակի հմտություններին, իսկ այդ դեպքում, երբ փոխնախարարը, ինչպես նաև Գլխավոր շտաբի պետը, պրոֆեսիոնալ զինվորականներ են, նախարարը կարողանում է համակշռել շատ գործոններ։

«Օրինակ՝ Սամվել Բաբայանի մասին շատ պատմություններ եմ լսել, որ ինքը ռազմական կրթություն չուներ, ինքնուս էր, բայց, այսպես ձևակերպեմ, կան ինքնուս մարդիկ, որոնք կարող են լինել լավ ռազմագետներ և կառավարիչներ։ Մենք կարող ենք ասել, որ Տոնոյան Դավիթը հին համակարգից նոր համակարգ հաջողությամբ անցում կատարած դեմքերից է, սկզբում ավելի ակտիվ էր, հիշենք ռուսական ռազմական հենակետի վերաբերյալ նրա դիրքորոշումը, ըստ որի, այնտեղ ամեն ինչ քարի վրա գրված չէ, կան վիճահարույց խնդիրներ, և կարող ենք դրանք վերանայել, սակայն այսօր պարոն Տոնոյանը չի հայտնվում հանրային հարթակներում և կենտրոնացած է իր աշխատանքների վրա»,- այսօր հրավիրված մամուլի ասուլիսի ժամանակ ասաց Նարինե Դիլբարյանը։

Ըստ լեզվաբանի՝ այսօր դժվար է արձանագրել, թե ինչ է փոխվել բանակում․ դրա վերաբերյալ, ըստ նրա, կա և՛ դրական տեղեկություն,  և՛ բազմաթիվ խնդրիների առկայության մասին վիճակագրություն։

«Սակայն պետք է արձանագրել, որ բանակում պրոֆեսիոնալների կուտակումը շատ ավելի բարձր է, քան մյուս նախարարություններում, և դա խանդավառող է»,- նկատեց Դիլբարյանը։

Ասուլիսի ընթացքում լեզվաբանն անդրադարձավ նաև վերջին շրջանում ամենաշատը քննարկվող թեմաներից մեկին՝ պետական գերատեսչություններում պարգևավճարների հարցին:

«Հետազոտությունները ցույց տվեցին, որ օրենքի խախտումներ են եղել․ կարծում եմ, որ այն մարզպետը, որը օրենքի խախտումով իրեն պարգևատրել է 104 տոկոսով, պետք է այդ ավելացված մասը վերադարձնի համայնքային բյուջե կամ այնտեղ, որտեղից վերցրել է։ Նույնը վերաբերում է նաև այն մարզպետներին, որոնք պարգևատրել են 2-3 ամսվա աշխատանքային ստաժ ունեցող աշխատակիցներին․ այսինքն՝ այն բոլոր դեպքերը, որտեղ օրենքի խախտում է եղել, պետք է այդ գումարները վերադարձնել»,- ասաց լեզվաբանը՝ նշելով, որ եթե անգամ նշում են, որ պարգևատրվածները աշխատել են աշխատանքային ժամից ավելի, սական ո՛չ մարզերում, ո՛չ էլ օրինակ ՊԵԿ-ում մեծ հաջողություններ չեն արձանագրվել, որի համար կարելի էր մեկին պարգևատրել։

«Ես ուրախ կլինեի, որ «Իմ քայլը» դատապարտեր այդպիսի գործելակերպը»,- ասաց նա։

Մանրամասները՝ տեսանյութում։

Աղավնի Սուքիասյան