Ադրբեջանական կողմի հետ քննարկվել է Արցախը բանակցային կողմ դարձնելու հարցը. ԱԳ նախարար. ՏԵՍԱՆՅՈՒԹ

Ադրբեջանական կողմի հետ հանդիպումներում Հայաստանը քննարկում է Արցախը բանակցային կողմ դարձնելու հարցը: Հունվարի 28-ին լրագրողների հետ ճեպազրույցում վստահեցրեց ՀՀ ԱԳ նախարար Զոհրաբ Մնացականյանը:

Հարցին, թե Փարիզում տեղի ունեցած վերջին՝ 4 ժամ տևած հանդիպման ժամանակ արդյո՞ք Ադրբեջանի ԱԳ նախարար Էլմար Մամեդյարովի հետ քննարկվել է Արցախը բանակցային կողմ դարձնելու հարցը, Զոհրաբ Մնացականյանը պատասխանեց. «Այո՛, իհարկե: Այս բոլոր հարցերը հնարավորության սահմաններում քննարկման առարկա են»:

Նրա խոսքով՝ 20 տարի ձևավորված է եղել բոլորիս հայտնի ձևաչափ, որի շրջանակում տեղի են ունեցել բանակցությունները:

«Սա պրագմատիկ խնդիր է մեզ համար: ՀՀ վարչապետը ներկայացնում է Հայաստանի Հանրապետությունը և ընտրված է ՀՀ ժողովրդի կողմից: Լեռնային Ղարաբաղի իշխանություններն ընտրված են Արցախի Հանրապետության ժողովրդի կողմից: Մենք չենք կարող բոլոր պարտավորությունները վերցնել՝ առանց Լեռնային Ղարաբաղի: Սա բանակցությունների արդյունավետության համար է»,- հայտարարեց Զոհրաբ Մնացականյանը:

Ինչ վերաբերում է Վիեննայի և Սանկտ Պետերբուրգի համաձայնություններին, ԱԳ նախարարի խոսքով՝ դրանք վերաբերում են ռիսկերի նվազեցմանը:

«Մենք ունենք Վիեննան և Սանկտ Պետերբուրգը, դրան ավելացել է նաև Դուշանբեն: Մենք հասել ենք մի իրավիճակի, երբ կան նվազ ռիսկեր, հանգստություն շփման գծում և սահմանին, և սա նպաստավոր է, չէ՞: Որևէ հարց դուրս չի եկել: Մեզ համար ռիսկերի նվազեցումը եղել և մնում է ամենաէական հարցերից մեկը»,- շեշտեց Զոհրաբ Մնացականյանը:

Մանրամասները՝ տեսանյութում