03.09.2026 | 23:17
Հայտնի են Ֆրանսիայի դեսպանատան ընդունելությունից հետո գրանցված թունավորման հնարավոր պատճառները. ՍԱՏՄ-ն մանրամասնել է
72 ժամում Վրաստանում իշխանափոխություն կանեմ. Միխեիլ Սաակաշվիլի
Քաղաքականություն
28.01.2019 | 12:31
Վրաստանի նախկին նախագահ Միխեիլ Սաակաշվիլին խոստացել է հայրենիք վերադառնալ և իշխանափոխություն կատարել։ Այս մասին Սաակաշվիլին հայտարարել է Rustavi 2 հեռուստաընկերության եթերում. հաղորդում է korrespondent.net-ը:
Նախկին նախագահը, որի նկատմամբ Վրաստանում այժմ հետախուզում է հայտարարված, պատրաստվում է հայրենիք վերադառնալ այն դեպքում, երբ համոզված կլինի, որ առնվազն 72 ժամ երկրում ազատ տեղաշարժի իրավունք կունենա։
«Սա խաղաղ իշխանափոխության իմ սցենարն է»,- նշել է Սաակաշվիլին։
Նա նաև հայտարարել է, որ պայքարում է Վրաստանի ներկայիս ղեկավարների՝ մասնավորապես Բիձինա Իվանիշվիլիի վարած քաղաքականության դեմ։
Սաակաշվիլին Վրաստանի այժմյան դրությունը հոգեբուժարանի հետ է համեմատել․ «Վրաստանի իշխանություններն ինձ հիշեցնում են այն պահը, երբ հոգեկան հիվանդները բժիշկներին հոգեբուժարանում են փակում։ Այժմ ամենակարևորն այդ հիվանդներին առանց ողբերգության, բռնության ու զոհերի չեզոքացնելն է»։
Հիշեցնենք, որ Միխեիլ Սաակաշվիլին Վրաստանը լքել է 2013 թվականին և նրա դեմ հարուցված մի շարք քրեական գործեր կան։ Վրաստանի նախկին նախագահը այս պահին բնակվում է Նիդեռլանդներում։
