20.05.2026 | 10:16
Նարեկ Կարապետյանը շարունակում է պնդել, որ միայն ՀՀ քաղաքացի է
Հունաստանի խորհրդարանը վավերացրել է Մակեդոնիայի անվանափոխության մասին համաձայնագիրը
Քաղաքականություն
25.01.2019 | 20:18
Հունաստանի խորհրդարանը վավերացրել է Մակեդոնիայի անվանափոխության մասին համաձայնագիրը, որով հարավսլավական այս հանրապետությունը կոչվելու է Հյուսիսային Մակեդոնիա: Քվեարկությանը նախորդել են խորհրդարանում բուռն քննարկումներն ու զանգվածային բողոքի ցույցերը խորհրդարանի շենքի առջև: Այս մասին գրում է «Վեդոմոստի»-ն՝ վկայակոչելով Kathimerini պարբերականը:
Համաձայնագիրն ընդունվել է ձայների 153 «կողմ», 146 «դեմ» և 1 «ձեռնպահ» հարաբերակցությամբ: Այսպիսով, գոնե «թղթի վրա» լուծվեց երկու երկրների միջև 27 տարի գոյություն ունեցող կոնֆլիկտը:
Հունական ընդդիմությանը հարևան պետության՝ «Մակեդոնիա» բառի օգտագործմամբ ցանկացած անվանում դուր չի գալիս: Նրանք դժգոհ են նաև այն հանգամանքից, որ Աթենքը զրկվում է Սկոպյեի վրա ազդեցության գլխավոր լծակից՝ ԵՄ-ին և ՆԱՏՕ-ին այդ երկրի անդամակցության նկատմամբ վետոյի իրավունքից:
The New York Times-ը Հունաստանի խորհրդարանում անցկացված քվեարկությունն «Արևմուտքի հաղթանակ» է կոչել, որն «ամրապնդել է Բալկաններում դիրքերը՝ չնայած Մոսկվայի բողոքներին»:
Ակնկալվում է, որ անվան փոփոխությունը պետք է վերջ դնի Մակեդոնիայի և Հունաստանի միջև վեճին, որը ձգվում է 1991 թվականին Հարավսլավիայի փլուզման ժամանակներից: Հունաստանը պարբերաբար արգելափակում էր Եվրամիությանն ու ՆԱՏՕ-ին Մակեդոնիայի անդամակցությանը՝ պահանջելով փոխել հանրապետության անվանումը, որպեսզի այն առանձնանա հունական Մակեդոնիա մարզից և բացառի ցանկացած տարածքային և իմիջային պահանջ:
