20.10.2026 | 13:31
Հայաստանից 908,6 տոննա ծաղիկ է արտահանվել 30 երկիր․ արտահանման աշխարհագրությունն ընդլայնվել է
Երևանի ավագանու «Իմ քայլը» խմբակցությունում պարգևավճարների հարցով անհամաձայնություն կա. խմբակցության քարտուղարի պարզաբանումը
Քաղաքականություն
25.01.2019 | 17:09
Երևանի ավագանու «Իմ քայլը» խմբակցությունում տարաձայնություններ կան կապված պարգևավճար ստացած անձանց անունները հրապարակելու հետ: Factor.am-ի տեղեկություններով՝ խմբակցության որոշ անդամներ պնդում են, որ պարգևատրումների մասին տեղեկատվությունը պետք է հրապարակվի և հանրությանը դառնա հասանելի, մյուսները դեմ են հրապարակմանը:
Հիշեցնենք՝ Factor.am-ը գրել է, որ Երևանի քաղաքապետարանը 2018 թվականին 474 մլն դրամ կամ 974 հազար ԱՄՆ դոլար է հատկացրել պարգևատրումներին: Թե ովքեր են պարգևատրվածները քաղաքապետարանը գաղտնի է պահում: Երևանի ավագանու «Լույս» խմբակցությունը պատրաստում է դատական հայց՝ ընդդեմ Երևանի քաղաքապետ Հայկ Մարությանի գործունեության՝ պահանջելով հրապարակել քաղաքապետարանի և համայնքապետարանների պարգևավճար ստացած երկու հազար աշխատակցի անունները:
«Իմ քայլը» խմբակցությունում առկա անհամաձայնությունների հետ կապված Factor.am-ը փորձեց պարզաբանում ստանալ խմբակցության քարտուղար Հասմիկ Խաչունցից:
Մեր հարցին՝ խմբակցությունում կա՞ն տարաձայնություններ պարգևավճար ստացածների տվյալները հրապարակելու հետ կապված, Հասմիկ Խաչունցն ասաց՝ կան քննարկումներ։
«Մենք միշտ բոլոր հարցերը քննարկում ենք և կոնսենսուսային որոշումները հրապարակում ենք։ Բնականաբար յուրաքանչյուր անձ ունի իր կարծիքը, բայց խմբակցության դիրքորոշումը պետք է ֆիքսվի»,- նշեց «Իմ քայլ» խմբակցության քարտուղարը՝ հավելելով, որ առաջիկա օրերի ընթացքում դիրքորոշումը կհայտնեն:
Շողիկ Գալստյան
