02.07.2026 | 20:24
ՔՊ խմբակցության ղեկավարի թեկնածու է ընտրվել Արուսյակ Մանավազյանը. Նիկոլ Փաշինյան. ՏԵՍԱՆՅՈՒԹ
Սխալն ուղղելու համար պետք չէ հակառակ քայլերն անել. Նիկոլ Փաշինյանը՝ ԵՏՄ-ին Հայաստանի անդամակցության մասին
Տնտեսություն
25.01.2019 | 15:17
Երբ ես խորհրդարանի պատգամավոր էի, դեմ եմ քվեարկել ԵՏՄ-ին Հայաստանի անդամակցությանը, բայց դա չի նշանակում, որ այդ սխալն ուղղելու համար պետք է տրամագծորեն հակառակ քայլերն անել: Հունվարի 25-ին Մոսկվայում տեղի ունեցած ճեպազրույցում այս մասին ասել է ՀՀ վարչապետ Նիկոլ Փաշինյանը:
«Ես դեմ եմ քվեարկել ԵՏՄ-ին անդամակցության որոշմանը: Դրանից հետո բազմիցս ասել եմ, որ եթե մենք համարել ենք, որ դա սխալ որոշում է, չի նշանակում, այդ սխալն ուղղելու համար պետք է տրամագծորեն հակառակ քայլեր անենք»,- նշել է Փաշինյանը՝ պատասխանելով հարցին՝ ի վերջո ճի՞շտ էր ԵՏՄ-ին անդամակցելու վերաբերյալ Հայաստանի նախկին իշխանությունների որոշումը:
Որպես օրինակ նա նշել է Իրաքի հարցով ԱՄՆ նախկին նախագահ Բարաք Օբամայի դիրքորոշումը: «Բարաք Օբաման կարծում էր, որ նախագահ Ջորջ Բուշը սխալ է արել՝ Իրաք զորքեր մտցնելով, և նա որոշեց հակառակ քայլն անել. հետ կանչել Իրաքից զորքերը: Եվ մենք ի՞նչ ստացանք: Ստացանք «Իսլամական պետություն»: Փաստ է, որ Հայաստանի Հանրապետությունը ԵՏՄ անդամ է, և չեմ կարծում, որ կտրուկ շրջադարձերն օգտակար են միջազգային հարաբերություններում»,- ասել է վարչապետը:
Նիկոլ Փաշինյանի խոսքով՝ հիմա Հայաստանի ջանքերն ուղղված են ԵՏՄ-ն և ՀԱՊԿ-ն ավելի արդյունավետ դարձնելուն. «Մենք անում ենք հնարավոր ամեն ինչ, որպեսզի Հայաստանի անդամակցությունը ԵՏՄ-ին ավելի արդյունավետ, օգտակար և հեռանկարային լինի»:
