20.10.2026 | 12:23
Տիգրան Աբրահամյանի ճեպազրույցը. ՈՒՂԻՂ
100 հազարի կարող է հասնել հնարավոր կրճատվողների թիվը. «Իմ քայլը» խմբակցության պատգամավոր Վարազդատ Կարապետյան. ՏԵՍԱՆՅՈՒԹ
Քաղաքականություն
24.01.2019 | 19:17
Factor.am-ի հարցազրույցն Ազգային ժողովի «Իմ քայլը» խմբակցության պատգամավոր Վարազդատ Կարապետյանի հետ
– Պարոն Կարապետյան, մարզպետների ու այլ գերատեսչությունների կողմից իրենց և իրենց աշխատողներին պարգևավճարներ տալու իրողությունը որքանո՞վ էր արդարացված, թեկուզ սոցիալական հավասարության կամ արդարության տեսանկյունից:
– Մենք այդ հարցը երկու հարթության մեջ կարող ենք քննարկել: Իրավական տեսանկյունից խնդիր չկա, որովհետև դա դեռևս 2017 թվականից պլանավորված գործընթաց էր: Բարոյական հարթության մեջ, հնարավոր է, որ խնդիր կա: Ես չէի պարգևատրի: Մենք նման փորձ ունեցել ենք Փոքր ու միջին ձեռնարկատիրության զարգացման ազգային կենտրոնում, երբ ամբողջությամբ փոխեցինք պարգևատրումների համակարգը և այն դրեցինք արդյունքներով պայմանավորված վարձատրության վրա:
– Քննադատվում է նաև այն հանգամանքը, որ մարզպետներն ու այլ պաշտոնյաներ ընդամենը 6-7 ամիս են պաշտոնավարել, և ինչո՞ւ են իրենք իրենց պարգևավճար հատկացրել:
– Ես լսում էի Շիրակի մարզպետի խոսքը, որն ասում էր, թե իրեն 50 տոկոսի չափով է պարգևատրել՝ ելնելով իր աշխատած ամիսների քանակից: Իհարկե՝ նորից օրենքի խախտում չէ, որ մարդն իրեն ամբողջ տարվա կտրվածքով է պարգևատրում: Բայց կրկին բարոյական հարթության վրա, իհարկե, չենք կարող թույլ տալ, որ մարդն իրեն պարգևատրելու հնարավորություն ունենա: Պարգևատրումը պետք է լինի ավելի բարձր օղակներից: Մարզպետներին պետք է պարգևատրի վարչապետը կամ տարածքային կառավարման նախարարը:
– Կառավարությունը կառուցվածքային փոփոխության շրջանակում նախատեսում է կրճատել 5 նախարարություն: Այլ կառույցնե՞ր էլ կկրճատվեն:
– Ամբողջական կառույցների կրճատման մասին չեմ կարող ասել, բայց որ բոլոր կառույցներում ահավոր մեծ թվով, ուռճացված հաստիքներ կան, դա միանշանակ է: Դա նշանակում է, որ այդ ծառայությունը մեր հանրությանը մատուցելու համար պետք է, ենթադրենք, երկու-երեք անգամ ավելի քիչ, բայց բարձր վարձատրվող պրոֆեսիոնալ մարդ, քան հիմա մեր ունեցած թվաքանակն է ամբողջ պետական կառավարման համակարգում:
– Օպտիմալացման արդյունքում մոտ 50 հազար աշխատողների կրճատման մասին է խոսք գնում: Իրականում քանի՞ աշխատող կարող է կրճատվել պետական համակարգում:
– Հաշվարկներ չկան, գնահատականները տարբեր են: Իրականում կարող է մինչև 100 հազարի հասնել: Մենք այդ հարցը յուրաքանչյուր ոլորտում, յուրաքանչյուր հիմնարկում պետք է առանձին քննարկենք:
– Նման թվաքանակ կրճատելու դեպքում սոցիալական լուրջ խնդիր կառաջանա…
– Համաձայն եմ, բայց սոցիալական խնդիրը կարելի է սոցիալական նպաստներով լուծել:
– Ինչպե՞ս: Երկու ամիս սոցիալական նպաստ տալով կլուծվի՞ խնդիրը:
– Հնարավոր է նպաստը տալ մեկ տարի՝ միաժամանակ մարդուն տալով լրացուցիչ կրթություն ստանալու կամ սեփական բիզնեսը հիմնելու հնարավորություն: Կառավարության ամենակարևոր հայտարարություններից մեկն այն է, որ բոլոր մարդիկ սկսեն բիզնեսով զբաղվել, և դրա համար էլ միկրոբիզնեսը Երևանում չի հարկվելու:
Հարցազրույցն ամբողջությամբ՝ տեսանյութում
Արմինե Ավետյան
