07.03.2026 | 22:11
Նոր նշանակումներ՝ մարմնամարզության Հայաստանի հավաքականներում
Ժողովրդավարության ամրապնդման հարցում Հայաստանը ԵՄ-ի աջակցության կարիքն ունի. Փաշինյանի հարցազրույցը «Եվրոնյուզին». ՏԵՍԱՆՅՈՒԹ
Քաղաքականություն
24.01.2019 | 16:19
Հայաստանի քաղաքացիները ոգեշնչված են երկրում տեղի ունեցած ժողովրդավարական հեղափոխությամբ, այդուհանդերձ, կարիք կա նաև ինստիոտուցիոնալ առումով ամրապնդել այդ ժողովրդավարությունը: «Եվրոնյուզ»-ին տված հարցազրույցում այս մասին ասել է ՀՀ վարչապետ Նիկոլ Փաշինյանը՝ հավելելով, որ այդ հարցում Հայաստանը Եվրամիության աջակցությունն է ակնկալում:
Փաշինյանի խոսքով՝ պատրաստվում են պարզեցնել հարկային օրենսդրությունը, որպեսզի բիզնես գործունեությունը Հայաստանում ավելի դյուրացվի:
«Պատրաստվում ենք նվազեցնել եկամտահարկը և շահութահարկը, որպեսզի օտարերկրյա ներդրումների համար հայաստանյան գործարար և ներդրումային միջավայրն ավելի գրավիչ դարձնենք»,- ընդգծել է Փաշինյանը։
Խոսելով Հայաստանում սպասվող հրատապ բարեփոխումների մասին՝ Նիկոլ Փաշինյանը նշել է, որ ամենակարևոր բարեփոխումները տնտեսության հետ են կապված, քանի որ կարիք կա քաղաքական հեղափոխությունը փոխակերպել տնտեսական հեղափոխության:
Մյուս բարեփոխումն աղքատ մարդկանց խրախուսելն է, որպեսզի Հայաստանում հաղթահարվի աղքատությունը:
«Փոքր և միջին բիզնեսից բացի՝ ստեղծելու ենք նոր՝ միկրոբիզնես, որն ազատված կլինի հարկերից։ Սա կխրախուսի մարդկանց միջոցներ ձեռնարկել և բիզնես գործունեություն սկսել, ինչով կօգնեն կառավարությանն աղքատության դեմ պայքարում»,- ընդգծել է Հայաստանի վարչապետը:
Ինչ վերաբերում է 2019 թվականի աշխարհաքաղաքական ծրագրերին, Փաշինյանը խոսել է Հայաստանի՝ ԵՏՄ-ին անդամակցելու և Եվրամիության հետ Համապարփակ և ընդլայնված գործընկերության համաձայնագիր ունենալու մասին և հավելել, որ այդ ոլորտում որևէ նոր ծրագիր չկա, քանի որ Հայաստանն արտաքին քաղաքականության մեջ շրջադարձեր չի ունենալու:
«Եվրամիության հետ համաձայնագիրը ենթադրում է Հայաստանում սոցիալական և քաղաքական կյանքի բարեփոխումներ, և մենք պատրաստվում ենք ինստիտուցիոնալ առումով հզորացնել հայաստանյան ժողովրդավարությունը ՀԸԳՀ-ի և ԵՄ հետ համագործակցության շնորհիվ»,- նշել է Փաշինյանը:
