03.09.2026 | 23:17
Հայտնի են Ֆրանսիայի դեսպանատան ընդունելությունից հետո գրանցված թունավորման հնարավոր պատճառները. ՍԱՏՄ-ն մանրամասնել է
2015-ին մահացած դատապարտյալի գործով վարույթն իրականացնող մարմինը գործողություններ է իրականացնում միայն տուժող կողմի միջնորդելուց հետո. ՀՔԱՎ
Հասարակություն
24.01.2019 | 14:18
2015թ. ապրիլին «Նուբարաշեն» ՔԿՀ-ում ինքնավնասում կատարելու հետևանքով հիվանդանոցում մահացած դատապարտյալ Սերոբ Գևորգյանի իրավահաջորդի ներկայացուցիչ, ՀՔԱ Վանաձորի գրասենյակի փաստաբան Ա. Զալյանը 2019թ. հունվարի 10-ին հերթական միջնորդությունն է ներկայացրել վարույթն իրականացնող մարմնին:
Ս. Գևորգյանը «Հրազդան» ՔԿՀ-ից «Նուբարաշեն» ՔԿՀ տեղափոխվելուց հետո 2015 թ. ապրիլի 20-ին ինքնավնասում է արել, որից չորս օր անց միայն տեղափոխվել է հիվանդանոց, որտեղ էլ երեք օր անց մահացել է:
Հելսինկյան քաղաքացիական ասամբլեայի Վանաձորի գրասենյակը Ս. Գևորգյանի իրավահաջորդի իրավունքների պաշտպանությունն ստանձնել է ՀՀ քրեական օրենսգրքի 130-րդ հոդվածի 2-րդ մասով քրեական գործ հարուցվելուց հետո: Ընդ որում՝ քրեական գործ է հարուցվել քրեական գործ չհարուցելու մասին 2015թ. մայիսի 7-ի որոշումը բողոքարկելուց հետո միայն:
Քրեական գործի շրջանակում նշանակված դատաբժշկական փորձաքննության եզրակացությամբ՝ «Նուբարաշեն» ՔԿՀ-ում իրականացվել է ոչ պատշաճ բժշկական օգնություն, թույլ են տրվել մի շարք խախտումներ:
2018թ. մարտի 28-ին կրկին տուժող կողմի միջնորդությամբ նշանակվել է կրկնակի դատաբժշկական փորձաքննություն: Այդ միջնորդությամբ տուժողի իրավահաջորդի ներկայացուցիչը մատնանշել էր փորձագիտական եզրակացության մեջ առկա մի շարք հակասություններ ու թերացումներ:
Տուժող կողմը ուշադրության արժանի հանգամանքներ է նկատել նաև կրկնակի դատաբժշկական փորձաքննության եզրակացության մեջ:
