Ոտքի վրա, առանց միջնորդների հանդիպումները շարունակելով՝ ԼՂ հակամարտությունը կդարձնենք  փողոցային կռիվ. Արման Բաբաջանյան. ՏԵՍԱՆՅՈՒԹ

Factor.am-ի հարցազրույցը ՀՀ ԱԺ «Լուսավոր Հայաստան» խմբակցության պատգամավոր Արման Բաբաջանյանի հետ

– Պարոն Բաբաջանյան, Ուկրաինայում ՀՀ նախկին դեսպան Անդրանիկ Մանուկյանը սպառնացել էր Ձեզ դատի տալ այն հայտարարությունների համար, թե նրա պաշտոնավարման ժամանակ հայ–ուկրաինական հարաբերությունները վատացել են, և որ նա այդ երկրում հնդկահավերի ֆերմա ունի: Դատի տվե՞լ է:

– Անդրանիկ Մանուկյանը, դատի տալու սպառնալիքների հետ միասին, նաև միջոցներ է փնտրում, որպեսզի հաշտության գա ինձ հետ: Բայց ես նրա անունից դիմող մարդկանց ասում եմ, որ Անդրանիկ Մանուկյանի հետ ընդհանրապես վեճ չունեմ: Մանուկյանն անցյալ է թե՛ Հայաստանի, թե՛ ինձ համար: Ես ավելի շատ միտված եմ խոսել գործող դեսպանների մասին, նրանց պաշտոնավարման շարունակության նպատակահարմարության մասին:

– Իսկ եթե ԱնդրանիկՄանուկյանը, այնուամենայնիվ, որոշի դիմել դատարան, Դուք հայտարարել էիք, թե նրան կմերկացնեք՝ սկսած հոկտեմբերի 27-ի իրադարձություններից: Ինչի՞ մասին է խոսքը:

– Այն ամբողջ տեղեկատվական բազան, որը հիմք է հանդիսացել հոկտեմբերի 27-ից հետո նրա վերելքի, բիզնեսի և տնտեսական կարողության համար, ես պայմանավորում եմ այդ ոճրագործության վերաբերյալ նրա տեսակետի կտրուկ փոփոխմամբ: Եթե հիշում եք, ոճրագործությունից անմիջապես հետո նա կրկնում էր, որ մեղավորը Ռոբերտ Քոչարյանն է, բայց երբ նրան առաջարկվեց տրանսպորտի և կապի նախարարի պաշտոնը, նա անմիջապես փոխեց դիրքորոշումը և դարձավ ՀՀ ամենահարուստ մարդկանցից մեկը:

– Ձեր խմբագրած «Ժամանակ» թերթին և «Առաջին լրատվական» կայքին մի քանի անգամ դատի է տվել նաև Ռոբերտ Քոչարյանի ընտանիքը: Դատարանը որոշ դեպքերում Ձեր դեմ վճիռ է կայացրել։  Կհիշե՞ք, թե որքան գումար եք նրանց վճարել դատական հայցերի արդյունքում:

– Չեմ հիշի, բայց դրանք միլիոնավոր դրամների հասնող գումարներ են: Ի դեպ՝ տարիներ առաջ, երբ այդպիսի մի հայցադիմում ներկայացրեցին, խոստացան, որ ինձանից գանձվող գումարը կփոխանցեն մանկատանը: Եվ հիշում եմ, որ գումարը փոխանցելուց հետո լրագրողներին հանձնարարեցի զանգահարել Հայաստանի բոլոր մանկատներին և ճշտել, թե եղե՞լ է այդպիսի փոխանցում: Մենք ամեն օր զանգում էինք և գրում, որ Ռոբերտ Քոչարյանի ընտանիքը ստել է: Նրանք ձանձրացան կամ հոգնեցին մեր այդ հետևողականությունից և փոխանցումն արեցին:

– Երեկ Դավոսում հանդիպեցին ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը, անցած շաբաթ էլ Փարիզում հանդիպել էին երկու երկրների արտգործնախարարները։ Կարո՞ղ ենք ասել, որ ԼՂ հակամարտության կարգավորման բանակցությունները վերսկսվել են բավական երկար դադարից հետո:

– ԱԳՆ-ն պետք է պարզաբանումներ տա, թե ինչ է տեղի ունեցել հունվարի 16-ին Փարիզում: Եվ որևէ առարկայական հիմքով չպաշտպանված այն լավատեսությունը, որի մասին անընդհատ լսում ենք թե՛ կողմերից, թե՛ միջազգային կառույցներից, վտանգավոր տարրեր է պարունակում:

– Դուք բանակցություններից մանրամասնե՞ր եք ակնկալում:

– Ես ուզում եմ, որ իշխանությունն իր խոստմանը տեր լինի և ժողովրդի թիկունքում որևէ պայմանավորվածություն չկայացնի: Չէ՞ որ նրանք քանիցս խոսել են այն մասին, որ չեն պատրաստվում ժողովրդի թիկունքում որևէ բան պայմանավորվել։ Եվ մեզ հետաքրքրում է, թե ինչ կարող էին քննարկել արտգործնախարարները 4 ժամվա ընթացքում, մեզ հետաքրքրում է, թե ինչ կարող էին քննարկել մեկուկես ժամում Նիկոլ Փաշինյանն ու Իլհամ Ալիևը՝ առանց Մինսկի խմբի համանախագահող երկրների միջնորդության: Եթե մենք շարունակենք առանց ՄԽ համանախագահների ներկայության՝ ոտքի վրա, առանց նախապես պլանավորելու հանդիպել և ուղղակի խոսել բանակցությունների պատմության մասին, ինչպես վարչապետն էր ասում, ԼՂ հակամարտությունն աշխարհաքաղաքական հարցից կդարձնենք փողոցային կռիվ:

Հարցազրույցն ամբողջությամբ՝ տեսանյութում

Արմինե Ավետյան