Նկատվում է հանցավորության աճ․ համաներումը առավել վտանգավոր հանցագործություններ կատարած անձանց վրա է նաև տարածվել․ փաստաբան

Հայաստանում նկատվում է հանցավորության աճ, իսկ պետությունը ոչինչ չի անում, որպեսզի համաներման արդյունքում ազատության մեջ հայտնված քաղաքացիները նորից բանտում չհայտնվեն։ Այս մասին այսօր հրավիրված մամուլի ասուլիսի ժամանակ ասաց փաստաբան Արմինե Ֆանյանը։

«Միևնույն ժամանակ անհրաժեշտ է հասկանալ, որ այդ մարդիկ կարիք ունեն սոցիալականացման, զբաղվածության խնդրի լուծման: Առաջին քայլը կարող էր լինել որոշակի սոցիալական երաշխիքների տրամադրումը, ներառյալ՝ միջազգային փորձի կիրառումը, նրանց աշխատանքով ապահովելը՝ թեկուզ ոչ շատ բարձր վճարվող»,- ասաց փաստաբանը՝ նշելով, որ հանցագործությունների աճը պայմանավորված է սոցիալ-տնտեսական իրավիճակով։

Փաստաբանի համոզմամբ՝  մինչև համաներում հայտարարելը հանցավորության աճ ևս կար. «Եթե պետությունը այդքան լայն դաշտ ընդգրկող ակտ է ընդունել, ապա պետք է համաներվածների վերասոցիալականացման խնդրով ևս զբաղվեր, քանի որ, այն անձը, որը որոշ ժամանակ աշխատանք է փնտրում ու չի գտնվում, կրկին բռնում է հանցավորության ճանապարհը։ Իսկ մեզ մոտ վերասոցիալականացման մեխանիզմներ դեռևս չեն մշակվել։ Ստացվում է, որ այդ մարդկանց մոտ կրկին անազատության մեջ հայտնվելու հավանականությունը մեծ է»։

Ասուլիսի ընթացքում Արմինե ֆանյանը անդրադարձավ նաև փաստաբանների նկատմամբ հանրության վերաբերմունքին։

«Հանրային ճնշումներ կան և դա մեծապես պայմանավորված է փաստաբանների կողմից ստանձնած այն գործերի հետ, որոնց դեպքում հանրային շատ մեծ անհանդուրժողականություն կա։ Սա պայմանավորված է նաև փաստաբանի դերի, նշանակության թյուրըմբռնմամբ։ Փաստաբանի նկատմամբ դրսևորվող ցանկացած անհանդուրժողականության խիստ բացասական ենք վերաբերում, գնահատում ենք որպես նահանջ իրավական պետության զարգացման ճանապարհին»,- եզրափակեց նա։