18.01.2026 | 21:30
Վահագն Խաչատուրյանն այցելել է Ժնևի Սուրբ Հակոբ եկեղեցի
Դատարանի որոշումը մեզ համար անակնկալ չէր․ Մանվել Գրիգորյանի շահերի ներկայացուցիչ
Հասարակություն
22.01.2019 | 16:32
Գեներալ Մանվել Գրիգորյանի շահերի ներկայացուցիչ, փաստաբան Արսեն Մկրտչյանը Factor.am-ի հետ զրույցում մեկնաբանել է դատարանի՝ այսօր կայացրած կալանավորման որոշումը․ «Դատարանի որոշումն, իհարկե, մեզ համար անակնկալ չէր։ Անցած դատական նիստի ժամանակ էլ եմ ասել, որ մարդիկ չեն փոխվում, նկատի ունեմ Վերաքննիչ քրեական դատարանի նիստը նախագահող դատավոր Արսեն Նիկողոսյանին։ Նրա տրամադրվածությունը իմացել ենք, հայտնի է եղել, որևէ նոր բան տեղի չի ունեցել»։
Մեր հարցին՝ ի՞նչ ժամանակամիջոցում Մանվել Գրիգորյանը կտեղափոխվի մեկուսարան, պարոն Մկրտչյանը պատասխանեց, որ որևէ տեղեկություն չունի․ «Ես լիազորված չեմ որևէ տեղեկություն հայտնելու իր գտնվելու վայրի և վիճակի մասին»։
Հիշեցնենք, որ այսօր Վերաքննիչ քրեական դատարանում հրապարակվեց ԱԺ նախկին պատգամավոր Մանվել Գրիգորյանի գործով դատարանի որոշումը։ Գլխավոր դատախազության հատկապես կարևոր գործերով քննության նկատմամբ հսկողության վարչության պետ Վահագն Մուրադյանն ասաց, որ Մանվել Գրիգորյանն այսօր կկալանավորվի։
Գրիգորյանի պաշտպանները բազմիցս նշել են, որ նա ունի առողջական լուրջ խնդիրներ, որոնք կալանքի հետ համատեղելի չեն։
Հիշեցնենք, որ Մանվել Գրիգորյանին մեղադրանք է առաջադրվել ՀՀ ՔՕ-ի 235-րդ հոդվածի 2-րդ մասի՝ ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը մի խումբ անձանց կողմից և ՔՕ-ի 179-րդ հոդվածի 3-րդ մասի 1-ին կետով՝ խոշոր չափերի յուրացում հատկանիշներով:
