Քաղաքականություն
22.01.2019 | 14:16Հայտնի բլոգեր Ալեքսանդր Լապշինը կրկին Հայաստան է այցելել, այս անգամ՝ որպես զբոսաշրջիկ: «Ուզում եմ վարձույթով մեքենա վերցնել, շրջել երկրով, տեսնել այն, ինչ դեռ չեմ հասցրել»,- հունվարի 22-ին լրագրողների հետ հանդիպմանն ասաց Լապշինը:
Նա պատրաստվում է լինել Սյունիքում, որտեղ դեռ չի եղել, մասնավորապես՝ Մեղրիում. «Բացարձակապես զբոսաշրջային ծրագրեր են»: Բացի այդ՝ բլոգերը դիմել է ՀՀ պաշտպանության նախարարության մամուլի ծառայությանը՝ խնդրելով թույլ տալ այցելել սահմանամերձ գոտի: «Ուզում եմ իմ բլոգում ներկայացնել այն գյուղերի բնակիչների կյանքը, որոնք պարբերաբար գնդակոծվում են Ադրբեջանի կողմից: Դա, մասնավորապես, Նոյեմբերի շրջանն է»,- նշեց բլոգերը:
Ալեքսանդր Լապշինն անդրադարձավ նաև Արցախ այցելելու համար Ադրբեջանում իր ձերբակալությանն ու ՄԻԵԴ-ում գտնվող գործի մանրամասներին: Այս ամբողջ պատմությունը բլոգերը համարում է Բաքվի կողմից սեփական հանրությանը ներքին խնդիրներից շեղելու փորձ:
«Կարծում եմ՝ ի սկզբանե այս պատմությունը ներքին սպառման համար էր, ընդ որում՝ համեմատաբար անգրագետ բնակչության համար: Նրանց թշնամու կերպար է պետք: Ամենամեծ արտաքին թշնամին Հայաստանն է և, կարծում եմ, նրանց ոչ այնքան Ղարաբաղն է պետք, կարծում եմ՝ առհասարակ պետք չէ, որքան սառեցված կոնֆլիկտը, որը հնարավորություն է տալիս սեփական ժողովրդի նկատմամբ կիրառվող անպօրինականությունների ու կոռուպցիայի մեջ մեղադրել Հայաստանին»,- նշեց Ալեքսանդր Լապշինը:
Մանրամասները՝ տեսանյութում;
