Մարդիկ աշխատել են, չստանա՞ն իրենց պարգևավճարները. Հունան Պողոսյան

Սյունիքի մարզպետ Հունան Պողոսյանը ևս ինքն իրեն պարգևատրած մարզպետների թվում է։ Պողոսյանը, սակայն, դրանում որևէ խնդիր չի տեսնում։ Մամուլի հրապարակումների համաձայն՝ Պողոսյանը երկու անգամ է իրեն պարգևատրել, մինչդեռ մարզպետարանի տարածած պարզաբանման համաձայն՝ Սյունիքի մարզպետը ոչ թե երկու անգամ, այլ երկու հոդվածներով եւ մեկ անգամ է խրախուսել մարզպետարանի աշխատակիցներին և իրեն։ Պարզաբանման մեջ նաև ասվում է, որ Հունան Պողոսյանն իր պարգեւատրման միջոցներով մարզի տարբեր կառույցների մանուկների համար ամանորյա նվերներ է ուղարկել։ Թեմայի շուրջ Factor.am-ը զրուցել է Հունան Պողոսյանի հետ։

–Պարո՛ն Պողոսյան, թեև դուք պարզաբանում ներկայացրել եք այդ պարգևավճարների հետ կապված, այդուհանդերձ ձեզ և մյուս մարզպետներին քննադատողներն ասում են՝ հարցին պետք է նայել ոչ միայն օրենքի տեսանկյունից, այլ նաև բարոյական հարթությունում այն պետք է դիտարկել։ Համամիտ չե՞ք։
-Յուրաքանչյուրն ինքը պետք է մտածի՝ որքանով է բարոյական, որքանով՝ ոչ։ Որքան մարդ, այդքան կարծիք։

-Այսինքն՝ հանրության արձագանքը տեղին չե՞ք համարում։
-Ցանկացած առողջ քննադատություն տեղին է, մնացածը վերցրել չգիտեմ՝ ինչ են անում…Անհասկանալի շահարկումներ են անում, մարդիկ աշխատել են, չստանա՞ն իրենց պարգևավճարները։ Նորմալ աշխատել են, ցանկացած մարզպետարանում նորմալ աշխատողներ կան։ Վերցրել կառչել են, որ մարզպետներն են իրենք իրենց խրախուսում, ընդ որում՝ առանց խորանալու, հասկանալու։ Այդ շահարկումները քննադատության բովանդակությունը ճիշտ չեն դարձնում։

-Օրինակ, Վայոց ձորի մարզպետն ասում է՝ փորձում են իշխանության վրա բիծ քաշել, համաձա՞յն եք իր հետ։
-Ես հարյուր պատճառ կարող եմ ասել, բայց ձեռնպահ կմնամ։

-Այսինքն՝ որևէ խնդիր չեք տեսնում այդ պարգևավճարների հետ կապված։
-Իհարկե ոչ:

-Մի հարց էլ այլ թեմայով, հավաստի՞ են լուրերը, որ դուք նշանակվելու եք ՀՀ ոստիկանապետ։
-Դուք զանգել և ինձ հարցեր եք տալիս մարզպետի իրավունքներից և պարտականություններից և կտրուկ անցում եք կատարում։ Չկա նման բան, ես նստած իմ տեղում աշխատում եմ՝ որպես Սյունիքի մարզպետ։ Այդ նույն մամուլն այսօր էլ արդեն այլ թեկնածուի մասին է լուրեր տարածել։

Շողիկ Գալստյան