12.03.2026 | 23:35
Վթար Երասխ-Երևան ավտոճանապարհին․ կան տուժածներ
ԱԳՆ մամլո խոսնակից պահանջում եմ հարգալից, պատշաճ արձագանք՝ զերծ դասեր տալու և մեր հաշվին ինքնահաստատվելու գայթակղությունից. Արման Բաբաջանյան
Քաղաքականություն
22.01.2019 | 13:36
Առնվազն տարակուսանք է առաջացնում ՀՀ ԱԳ նախարարության մամլո խոսնակի՝ լրատվամիջոցներից մեկին տված հարցազրույցը՝ ի պաշտպանություն Ռոբերտ Քոչարյանի և Սերժ Սարգսյանի կողմից նշանակված և նրանց պաշտոնավարման ողջ ժամանակահատվածում իրենց ծառայությամբ տարիներ շարունակ Հայաստանի հեղինակությունն ու վարկը նսեմացրած որոշ նախկին և գործող դիվանագետների. ֆեյսբուքի իր էջում գրել է «Լուսավոր Հայաստան» խմբակցության պատգամավոր Արման Բաբաջանյանը:
Հիշեցնենք, որ Արման Բաբաջանյանը ԱԺ-ում լրագրողների հարցին ի պտասխան ասել էր, որ Միքայել Մինասյանը Հայաստանի լավագույն դեսպաններից է եղել, ինչը մեծ աղմուկ էր բարձրացրել:
«Ազգային ժողովի իմ ելույթում խոսք չի եղել դիվանագետի ինստիտուտի մասին: Ես հատկապես կանգ եմ առել ՀՀ ԱԳ նախարարության կողմից տարիներ ի վեր գոյություն ունեցող արատավոր պրակտիկայի վրա, մատնանշել եմ կոնկրետ դեպքեր և օրինակներ, որոնք, չնայած Հայաստանում տեղի ունեցած հեղափոխությանն ու հռչակված փոփոխություններին, ոչ միայն չեն դադարել, այլև շարունակվում են ավելի համառ ինտենսիվությամբ: Ես պնդում եմ, որ Հայաստանը ներկայացնող առանձին դիվանագետներ իրենց վարքով շարունակում են հեղինակազրկել մեր երկիրը, և Հայաստանի նոր իշխանության պարտականությունն է արագորեն սրբագրել, հետ կանչել նախկին քաղաքական արատավոր նշանակումները՝ հօգուտ բանիմաց և արհեստավարժ դիվանագետների: Խորապես տեղյակ լինելով Հայաստանի արտաքին քաղաքական գերատեսչությունում նախկին ռեժիմներից արմատացած տրամադրություններին և հեղափոխությունից հետո չմարսվող նոր իրողություններին՝ այնուամենայնիվ, ՀՀ ԱԳ նախարար Զոհրաբ Մնացականյանին հորդորում եմ հետայսու գերատեսչության աշխատակիցներին, այդ թվում՝ գործող դիվանագետներին զգուշացնել պատշաճ արձագանքել ՀՀ ԱԺ պատգամավորի որևէ հայտարարության: Մամլո խոսնակից պահանջում եմ հարգալից, պատշաճ արձագանք՝ զերծ դասեր տալու և մեր հաշվին ինքնահաստատվելու գայթակղությունից։ Սա ասում եմ նաև ապագայում նախարարին ՀՀ Ազգային ժողովում անհարմար վիճակի մեջ չդնելու համար: Արտաքին քաղաքական ճակատում հետագա անդառնալի բացթողումներն անթույլատրելի են, վարդանօսկանյանական և էդուարդնալբանդյանական ժամանակներն էլ անվերադարձ անցյալում են: Եթե որոշ պաշտոնյաներ՝ նախարարի գիտությամբ կամ առանց նրա իմացության, կարոտում են այդ ժամանակները, համոզված եմ, որ նրանք անելիք չունեն նոր Հայաստանի արտաքին գործերի նախարարությունում: Որպես ԱԺ պատգամավոր և որպես ՀՀ ԱԺ արտաքին հարաբերությունների հանձնաժողովի անդամ՝ առաջարկների մեծ փաթեթով պատրաստվում եմ լծվել բեղուն աշխատանքի: Այսպիսի միջադեպերը չեն կարող օգնել ապահովելու ՀՀ ԱԳ նախարարության հետ համագործակցության անհրաժեշտ աշխատանքային ոգին»,- գրել է պատգամավորը:
