Վալերի Օսիպյանի քավոր Կարեն Կարապետյանի գործը հասել է Փաշինյանին․ ի՞նչ է կատարվել ՊԵԿ-ում․ մանրամասներ․ ՏԵՍԱՆՅՈՒԹ

Պետական եկամուտների կոմիտեն՝ հանձինս նրա նախագահի, պատժում է երկրում կոռուպցիոն և հարկային հանցագործությունների վերաբերյալ ՀՀ վարչապետին տեղեկություններ տրամադրողներին․ պատժվում են նրանք, ովքեր կոռուպցիայի կամ  հանցագործությունների մասին  տեղեկություններ են բացահայտում, իսկ այս ամենից հետո անիմաստ է խոսել ՊԵԿ նախագահի կողմից պաշտոնական լիազորություններն անցնելու, անգործություն դրսևորելու կամ հակապետական գործունեությամբ զբաղվելու մասին։

Այս մասին այսօր հրավիրված մամուլի ասուլիսի ժամանակ ասաց փաստաբան Տիգրան Հայրապետյանը՝ ներկայացնելով, իր բնորոշմամբ,  փաստեր ՊԵԿ նախագահի գործունեությունից։

«Հունիս-հուլիս ամիսներին ՊԵԿ օպերատիվ հսկողության վարչության պետ նշանակվեց Կարեն Կարապետյանը․ մեկ ամսվա ընթացքում նա մի շարք բացահայտումներ իրականացրեց, որոնցից մեծ մասը հրապարակվել են մամուլում, բացի այդ, նրա կողմից բացահայտվել են մի քանի կոռուպցիոն սև սխեմաներ, որոնք հանդիսանում են հարկային հանցագործություններ․ սա ոչ թե հարկեր թաքցնելուն է վերաբերում, այլ նրան, որ պետբյուջեից միլիարդավոր դրամներ են կորզել։ Սա, բնականաբար, դուր չեկավ որոշ, այսպես ասած, պետական պաշտոնյաների, որի արդյունքում ՊԵԿ նախագահը  ծառայողական քննություն սկսեց օպերատիվ հսկողության վարչության նկատմամբ։ Չնայած, որ ծառայողական քննությունը նշանակվել է այդ վարչության նկատմամբ, սակայն ՊԵԿ նախագահը ապօրինի կասեցնում է Կարեն Կարապետյանի գործունեությունը և մեկ այլ ապօրինությամբ կապարակնքում նրա աշխատասենյակը»,- ասաց փաստաբանը։

Վերջինիս խոսքով՝ ՊԵԿ նախագահը դիմել է ՀՔԾ-ին՝ Կարեն Կարապետյանի նկատմամբ քրեական գործ հարուցելու համար, սակայն երեք ամիս անց քրեական գործը կարճվել է Կարեն Կարապետյանի  արարքներում հանցակազմի բացակայության հիմքով, իսկ ՊԵԿ նախագահը չի թույլատրում Կարեն Կարապետյանին իր աշխատանքով զբաղվել՝ ավելին փոխում է այդ պաշտոնի համար անհրաժեշտ չափորոշիչները, որպեսզի Կարեն Կարապետյանը չկարողանա աշխատել, ինչից հետո Կարապետյանը այդ մասին տեղեկացնում է վարչապետ Նիկոլ Փաշինյանին, որը ՊԵԿ նախագահից  Կարեն Կարապետյանի գործի վերաբերյալ մանրամասներ է պահանջել։

Հիշեցնենք, որ Կարեն Կարապետյանը ոստիկանապետ Վալերի Օսիպյանի քավորն է։

Մանրամասները՝ տեսանյութում։