16.01.2025 | 20:13
Մեծ Բրիտանիան և Ուկրաինան 100-ամյա գործընկերության համաձայնագիր են ստորագրել
Սփյուռքի հարցերով կզբաղվի վարչապետի հատուկ հանձնարարություններով դեսպանը. Փաշինյանը՝ կառավարության կառուցվածքի փոփոխությունների մասին. ՏԵՍԱՆՅՈՒԹ
Քաղաքականություն
18.01.2019 | 21:21
ՀՀ վարչապետ Նիկոլ Փաշինյանը, ֆեյսբուքյան ուղիղ եթերով անդրադառնալով կառավարության կառուցվածքի մասին փոփոխություններին, նշեց, որ տարբեր գերատեսչություններ շատ հաճախ կրկնում են միմյանց գործառույթները, ինչը լավ չի անդրադառնում պետության վրա, կա նաև ոչ արդյունավետ կառավարման խնդիր:
«Մեր պետական կառավարման համակարգում 3.5-3.6 աշխատողին մեկ ղեկավար է հասնում: Սրա արդյունքում մենք ունենք այնպիսի իրավիճակներ, երբ, օրինակ, կան բաժիններ, օղակներ կան ղեկավարներ, բայց չկան ենթականեր:Սա արված է տարբեր պատճառներով. որովհետև բաժնի պետի աշխատավարձը ավելի բարձր է, տեղակալի աշխատավարձը նույնպես։ Սակայն սրանից բխում են նաև հավելյալ ծախսեր և, իհարկե, անարդյունավետություն, որովհետև պարզվում է, որ ղեկավարները ավելի շատ են, քան աշխատողները»,- ընդգծեց Փաշինյանը:
Վարչապետի հավաստմամբ՝ նախարարություների միացման արդյունքում կկրճատվեն ղեկավար աշխատողները, կլինեն ավելի քիչ նախարարներ, ծառայողական մեքենաներ, որի արդյունքում խնայված միջոցները կուղղվեն այլ աշխատանքի համար:
Նիկոլ Փաշինյանը խոսեց նաև Մշակույթի և Կրթության նախարարությունները մեկ տեղում տեսնելու անհրաժեշտության մասին:
«Կա նաև քաղաքական այլ խնդիր, որի համատեքստում եմ ես դիտարկում Մշակույթի և Կրթության նախարարությունները մեկ տեղում տեսնելու անհրաժեշտությունը: Մենք առաջինը չենք, որ ուզում ենք՝ այդ գերատեսչություններն իրար հետ մեկ տեղում լինեն. աշխարհում կա նման պրակտիկա»,- ասաց վարչապետը՝ թվարկելով այն երկրների անունները, որտեղ այդ նախարարությունները միասին են:
Նիկոլ Փաշինյանը վստահեցրեց, որ Սփյուռքի նախարարությունն իր համար ունի ռազմավարական նշանակություն, սակայն այդ նախարարությունը չունի այնպիսի գործառույթ, որով այլ գերատեսչություններ չեն զբաղվում:
«Մեր պատկերացումը հետևյալն է. ստեղծել այնպիսի համակարգ, որտեղ տարբեր գերատեսչություններ գործառույթներ կրկնելով՝ իրար չեն խանգարի, կհամակարգվեն վարչապետի աշխատակազմի կողմից: Սա ենթադրում է, որ Սփյուռքի նախարարության կորիզը, որպես ստորաբաժանում, կտեղավորվի վարչապետի աշխատակազմում: Այստեղ առաջանում է խնդիր. իսկ ո՞վ է այն ներկայացուցիչը, որը համակարգելու է այդ աշխատանը: Մենք ունենք մի քանի տարբերակ, որոնցից մեկն այն է, որ վարչապետի հատուկ հանձնարարություններով դեսպանը կզբաղվի սփյուռքի հետ տարվող աշխատանքների համակարգմամբ: Նա լիազորված կլինի վարչապետի անունից»,- ասաց Փաշինյանը:
