12.10.2026 | 14:44
Տնտեսագիտության ոլորտում Նոբելյան մրցանակի են արժանացել ամերիկացի երկու գիտնականներ
«Անհաջողության մատնվելու իրավունք չունենք»․ Փաշինյանի հոդվածը Դավոսի համաշխարհային խորհրդաժողովի կայքում
18.01.2019 | 17:25
Դավոսի համաշխարհային համաժողովի կայքում լույս է տեսել վարչապետ Նիկոլ Փաշինյանի հոդվածը, որտեղ մասնավորապես ասվում է․
«Անցյալ տարի Հայաստանում տեղի ունեցած փոփոխություններն իսկապես պատմական բնույթ էին կրում: Թավշյա հեղափոխությունը ժողովրդավարության հաղթանակ բերեց մեր երկիր: Հայտնի շարժումը հիմնված էր ոչ միայն մեր հասարակության բոլոր շերտերի, այլև վեց միլիոնանոց սփյուռքի կոնսենսուսի վրա: Դա առանց որևէ զոհի, ոչ բռնի հեղափոխություն էր: Սերը, եղբայրությունը և հանդուրժողականությունը հայ ժողովրդական շարժման կարգախոսներն էին:
Անցյալ դեկտեմբերին կայացած արտահերթ խորհրդարանական ընտրությունները հաստատեցին և ամրապնդեցին մեր հասարակության ժողովրդավարական ձգտումները: Դրանք ցույց տվեցին, որ նոր Հայաստանը ներկայացնող քաղաքական ուժերն իսկապես լայն հանրային աջակցություն են վայելում»:
Հոդվածի մյուս հատվածներում Փաշինյանը ներկայացնում է այն երկու հիմնական պատճաները, որոնք հանգեցրին հեղափոխությանը.
«Նախ, պատմականորեն, մեր հասարակության հիմնական արժեքները խորապես արմատավորված են ազատության և արդարության գաղափարների հիման վրա: 1988 թ. Հայաստանը եղել է առաջին երկրներից մեկը, որը խարխլել է կոմունիստական ռեժիմի հիմքերը՝ համազգային ժողովրդական շարժման միջոցով:
Երկրորդ, Հայաստանը դեպի ծով ելք չունեցող, սահմանափակ բնական ռեսուրսներով ու բավական բարդ աշխարհաքաղաքական տարածաշրջանում գտնվող երկիր է, որը անվտանգության լուրջ մարտահրավերներ ունի»:
Վարչապետի խոսքով՝ ժողովրդավարության հաստատումը որոշակի ժամանակ ու մտածելակերպի փոփոխություններ է պահանջում։
Իր հոդվածը Փաշինյանը եզրափակում է. «Մենք վճռական ենք հասնելու մեր վերջնական նպատակին`ունենալ կայուն, ժողովրդավարական և տնտեսապես զարգացող երկիր` հիմնված օրենքի գերակայության և հաշվետու կառավարման սկզբունքների վրա: Մենք ձախողվելու իրավունք չունենք: Մենք պարտավոր ենք արդարացնել մեր ժողովրդի վստահությունը և պաշտպանել ժողովրդավարությունը»:
