10.10.2026 | 14:28
ԵՄ-ն շնորհավորել է Երևանի 2808-ամյակը
Լենա Նազարյանը պարզաբանում է իր աղմուկ հանած հայտարարությունը
18.01.2019 | 15:42
Factor.am-ի հետ զրույցում Ազգային ժողովի փոխնախագահ Լենա Նազարյանը մեկնաբանեց իր այսօրվա աղմկահարույց հայտարարությունը։ Հիշեցնենք, որ ճեպազրույցից առաջ նա երկու լրագրողի խնդրել է զրույցը հեռախոսով չնկարել, այլ միայն ձայնագրել, ինչը դժգոհություն է առաջացրել:
Մեզ հետ զրույցում Լենա Նազարյանն ասաց, որ խոսքը բացառապես անհատական հարցազրույցների մասին է. «Անհատական հարցազրույցներ հեռախոսային տեսագրությամբ չեմ անելու: Պատճառն այն է, որ ես շատ հարգանքով եմ վերաբերվում այդ նյութը սպառողներին: Եթե հարցազրույց է, կարող է երկար տևել՝ 10-15 րոպե մոտավորապես, և կադրը կարող է մութ, անորակ ստացվել: Դա, իմ կարծիքով, անհարգալից վերաբերմունք է նյութը սպառողների հանդեպ, ես ուզում եմ այն որակյալ մատուցել»:
Factor.am-ի հարցին՝ ի՞նչ պետք է անեն այն լրագրողները, որոնք պրոֆեսիոնալ տեսախցիկներ չունեն, և տեսագրելու համար հեռախոս են օգտագործում, տիկին Նազարյանը պատասխանեց. «Այդ լրագրողները, որպես կանոն, կայքերի լրագրողներ են, չէ՞, տեքստային նյութեր են մատուցում: Թող աուդիոձայնագրություն անեն, խնդրեմ, որևէ խնդիր չկա: Իսկ ճեպազրույցները հիմնականում կարճ են տևում»։
ԱԺ փոխնախագահին տեղեկացրինք, որ իր այս հայտարարությունը դժգոհություն է առաջացրել լրագրողների շրջանում, ինչին ի պատասխան՝ Լենա Նազարյանը կրկնեց. «Խնդրանքս է, շնորհակալ կլինեմ, եթե ըմբռնումով մոտենաք»:
Տիկին Նազարյանի խոսքը քննադատողները նրան հիշեցնում են, որ օրեր առաջ նման վերապահում չի ունեցել, նաև մինչև իշխանություն դառնալն այդպիսի պահանջ չի առաջադրվել լրագրողներին:
«Ես երբեք լայվ չեմ մտել, վրդովվելու կարիք չկա, ընդամենը իմ խնդրանքն է, և շնորհակալ կլինեմ, եթե ըմբռնումով մոտենաք: Ճեպազրույցներ ավելի հաճախ կանենք, իսկ անհատական հարցազրույցներն անպայման կանենք աուդիոձայնագրությամբ կամ պրոֆեսիոնալ տեսախցիկով: Միակ մտահոգությունս է՝ իմ մատուցածը դիտողներին որակյալ մատուցելը: Պատկերի հետ էլ է կապված, ուզում եմ, որ մարդիկ չհոգնեն: Հիմա խնդրում եմ այդպես աշխատել»,- նշեց Լենա Նազարյանը:
