ԱՊՊԱ-ն կթանկանա՞․ ռիսկային վարորդները կվճարեն ավելի շատ, ոչ ռիսկայինները՝ ավելի քիչ․ ՏԵՍԱՆՅՈՒԹ

«Ապահովագրական ընկերություններում շուրջ յոթ տարի է գործում է գանձման մեկ հաստատված դրույքաչափ։ Վերջերս, սակայն, հարկ է առաջացել փոխել  այդ դրույքաչափերը՝ դրանով իսկ բարենպաստ պայմաններ ստեղծելով թե՛ վարորդների, թե՛ ապահովագրական ընկերությունների համար։ Այդ փոփոխություններով ապահովագրական բյուրոն հնարավորություն է տալիս ապահովագրական ընկերություններին մրցակցել և դրանով դաշտն ավելի ազատական է դառնալու։ Ապահովագրական ընկերությունների համար հաստատված դրույքաչափեր չեն լինելու, և այդ ընկերությունները տարբեր մեքենաների համար կկարողանան, ըստ նախապես սահմանված շեմի, սահմանել առանձին դրույքաչափ։ Ապահովագրական բյուրոն, սակայն, այս գործընթացը կվերահսկի՝ սահմանելով  նվազագույն և առավելագույն շեմեր։ Այս փոփոխությունը չի բերի  գլոբալ թանկացումներ, պարզապես այս կարգավորման արդյունքում ռիսկային վարորդները կվճարեն ավելի շատ, ոչ ռիսկայինները՝ ավելի քիչ»,- այսօր հրավիրված մամուլի ասուլիսի ժամանակ ասաց «Վարորդի Ընկեր» ԻՀԿ նախագահ, «Ավտոապահովագրողների բյուրոյի» խորհրդի անդամ Տիգրան Քեյանը։

Ըստ Տիգրան Քեյանի՝ առաջարկվող փոփոխությամբ փաստորեն նույն մեքենայի  համար  տարբեր ապահովագրական ընկերություններ կսահմանեն տարբեր  չափի  գումար՝ մի դեպքում դա կարող է լինել օրինակ 10․000 դրամ, մեկ այլ դեպքում՝ 20․000 դրամ։

«Վարորդի Ընկեր» ԻՀԿ նախագահի փոխանցմամբ՝ մինչ օրս եղել են ապահովագրական ընկերություններ, որոնք 10 տոկոս են միջնորդավճար տվել, կամ 15-35: «Սա ոչ թե շուկայական հարաբերություն, այլ անօրինական գործողություն է եղել»,- ասաց Քեյանը:

Հարցին՝ ԱՊՊԱ-ն այս փոփոխությունների հետևանքով թանկանա՞լու է,  Տիգրան Քեյանը պատասխանեց, որ որոշ հատվածի համար հնարավոր է, որ թանկացում լինի:

Մանրամասները՝ տեսանյութում։