11.10.2026 | 23:33
Հակոբ Շարբաթյանը՝ բռնցքամարտի Եվրոպայի Մ-17 չեմպիոն. ՏԵՍԱՆՅՈՒԹ
Եվրախորհրդարանը կտրուկ քննադատել է Ադրբեջանի իշխանություններին՝ Բաքվի դեմ պատժամիջոցների կոչ անելով
Քաղաքականություն
17.01.2019 | 16:49
Եվրախորհրդարանի հունվարի 17-ի նիստում քննարկվել է Ադրբեջանում մարդու իրավունքների խախտումների հետ կապված իրավիճակը, մասնավորապես՝ բլոգեր Մեհման Հուսեյնովի գործը: Եվրոպացի պատգամավորներն աննախադեպ քննադատության են ենթարկել Ադրբեջանի իշխանություններին, գրում է «Թուրան» գործակալությունը:
Աղբյուրի փոխանցմամբ՝ ելույթ ունեցած շուրջ երկու տասնյակ պատգամավորները, մասնավորապես, կարծիք են հայտնել, որ Ադրբեջանի իշխանությունները բազմաթիվ տարիներ անտեսում են սեփական պարտավորությունները, կոպտորեն խախտոում մարդու իրավունքներն ու ժողովրդավարության նորմերը: Նրանք նաև քննադատել են ադրբեջանական լոբբինգով զբաղվող եվրոպացի քաղաքական գործիչներին, որոնք Բաքվից փող են ստանում և աչք փակում այդ խախտումների նկատմամբ:
Պատգամավորները նշել են, որ պետք է վերջ դնել իշխանությունների կամայականություններին, պատժամիջոցներ կիրառել այդ երկրի առաջին դեմքի և մյուս պաշտոնյաների նկատմամբ, ովքեր մեղավոր են Ադրբեջանում մարդու իրավունքների խախտումների համար: Առևտրի հարցերի եվրահանձնակատար Սեսիլիա Մալսթրոմն էլ նշել է, որ Բրյուսելը մշտական երկխոսության մեջ է Ադրբեջանի իշխանությունների հետ և պահանջում է անհապաղ ազատ արձակել բլոգեր Մեհման Հուսեյնովին:
«Բլոգերի դեմ հարուցված նոր շիծու քրեական գործը հակասում է Եվրամիության և Ադրբեջանի գործընկերային հարաբերություններին: Մենք սատարում ենք Բաքվի հետ երկխոսությունը, և մեր այդ երկրի հետ նոր համաձայնագրի շուրջ բանակցությունները պետք է ներառեն ժողովրդավարությանը, մարդու իրավունքներին, օրենքի գերակայությանը և արդար պետական կառավարմանն առչնվող կետեր: Այդ դրույթների մշակման ընթացքում մենք ակտիվորեն համագործակցելու ենք Ադրբեջանի քաղաքացիական հասարակության ներկայացուցիչների հետ, և փետրվարի 5-ին Բաքվում շարունակելու ենք մեր խորհրդակցությունները»,- նշել է Մալսթրոմը: Եվրահանձնակատարը նաև հավելել է, որ ԵՄ Բաքվի գրասենյակը մշտապես ուշադրության կենտրոնում է պահում ինչպես Մեհման Հուսեյնովի, այնպես էլ մյուս քաղբանտարկյալների գործերը: Եվրախորհրդարանում տեղի ունեցած քննարկումներից հետո ընդունվել է բանաձև, որում պաշտոնական Բաքուն սուր քննադատության է ենթարկվում մարդու իրավունքների զանգվածային և կոպիտ խախտման համար:
