Տնտեսական թռիչք և ներդրումային բում. ե՞րբ սպասել. Բաբկեն Թունյան. ՏԵՍԱՆՅՈՒԹ

Ազգային ժողովի «Իմ քայլը» խմբակցության անդամ, տնտեսագետ Բաբկեն Թունյանը կարծում է, որ պատգամավորներն իրենց գործունեության ընթացքում պետք է կարողանան կառավարության բերած օրինագծերի վրա լավ աշխատել և դրանք ավելի լավը դարձնել, եթե կարիք լինի:

«ԱԺ-ն ինքն էլ պետք է լինի նախաձեռնող մարմին, և մենք չպետք է վերածվենք միայն կառավարության բերած օրինագծերը վավերացնող մարմնի: Եվ երրորդը, բնականաբար, կառավարության գործունեության նկատմամբ պատշաճ վերահսկողությունն է»,- Factor.am-ի թղթակցի հետ զրույցում ասաց պատգամավորը:

Դիտարկմանը, թե Ազգային ժողովի կողմից կառավարության նկատմամբ վերահսկողությունն ամենաշատն է կասկածի տակ դրվում, ինչպե՞ս կարող է «Իմ քայլը» դաշինքն իրապես վերահսկել իր առաջնորդ Նիկոլ Փաշինյանին, Բաբկեն Թունյանն արձագանքեց. «Եթե մենք վերահսկում ենք կառավարության գործունեությունը, դրա ամենամեծ շահառուն լինում է հենց Նիկոլ Փաշինյանը՝ որպես կառավարության ղեկավար: Նիկոլ Փաշինյանն անձամբ բոլոր գործառույթները չի իրականացնում, այնտեղ բազմահազարանոց աշխատակազմ կա, և որպեսզի դու հասկանաս, թե որտեղ ինչ արդյունավետությամբ են աշխատում, պետք է կողքից ինչ-որ կառույց լինի»:

Հարցին՝ ի՞նչն է պատճառը, որ մինչև հիմա այդպես էլ ներդրումային բում չտեսանք, պատգամավորը պատասխանեց. «Չտեսանք, որովհետև միայն վերջերս ունեցանք, այսպես ասած, հեղափոխության ամփոփում: Մենք ունեինք մի իրավիճակ, երբ գործադիրում մի քաղաքական ուժ էր, օրենսդիրում՝ մեկ այլ, ինչը ոչ ստանդարտ իրավիճակ է: Ներդրողների համար սա վատ մեսիջ է, քանի որ նրանք ուշադրություն դարձնում են ամեն մանրուքի, և քաղաքական անորոշությունը ցանկացած երկրում ամենահետ պահող հանգամանքներից է»:

Մանրամասները՝ տեսանյութում