Մարուքյանը մեղադրում է Քոչարյանին. ՏԵՍԱՆՅՈՒԹ

Ժամանակին Ռոբերտ Քոչարյանն ուժային մարմինները բերել է միայն իր վերահսկողության տակ, և քաղաքական որևէ պայմանավորվածության, որևէ կոալիցիայի ստեղծման ժամանակ այդ հարցը չի քննարկվել: Հունվարի 17-ին խորհրդարանում լրագրողների հետ զրույցում ասաց «Լուսավոր Հայաստան» խմբակցության ղեկավար Էդմոն Մարուքյանը՝ անդրադառնալով Ոստիկանությունն ու Ազգային անվտանգության ծառայությունը նորից նախարարություններ դարձնելու խնդրին:

«Դրանք դուրս են մնացել քաղաքական, քաղաքացիական, պառլամենտական վերահսկողությունից: Ընդ որում՝ մինչ այդ եղել են նախարարություններ, բայց Հայաստանը եղել է նախագահական երկիր, պատկերացնո՞ւմ եք խայտառակությունը: Հետո Հայաստանը դարձել է կիսանախագահական երկիր, այսինքն՝ պառլամենտի լիազորություններն ավելացել են, բայց դրանք մնացել են պառլամենտական վերահսկողությունից դուրս: Հետո Հայաստանը դարձել է պառլամենտական երկիր, նախորդ իշխանությունները, ինչպես ասում են՝ հակահեղափոխական, դա չեն ուղղել, հիմա հեղափոխական իշխանություններն ասում են՝ սրանք մեզ պետք են»,- հայտարարեց Մարուքյանը:

Նրա պնդմամբ՝ ուժային այդ կառույցները պետք է նախարարություն դառնան, իսկ Սահմանադրությունը թույլ է տալիս 18 նախարարություն ունենալ:

«Ավելին ասեմ, «Ելք» խմբակցությունը նման նախագիծ է ներկայացրել, խմբակցության ղեկավար Նիկոլ Փաշինյանն էլ ստորագրել է, որտեղ այդ մարմինները եղել են նախարարություններ: Սակայն նախագիծը մերժվել է ՀՀԿ իշխանության կողմից: Հիմա պետք է դա արվի»,- ասաց ԼՀԿ խմբակցության ղեկավարը՝ հայտարարելով, որ այս հարցում իրենք չեն զիջելու:

Մանրամասները՝ տեսանյութում