«Իմ քայլ»-ի պատգամավոր Հովիկ Աղազարյանի որդին ՀՅԴ-ական է. հայրը պատճառ չի տեսնում, որ տղան դուրս գա Դաշնակցությունից

Ազգային ժողովի «Իմ քայլը» խմբակցության պատգամավոր, «Քաղաքացիական պայմանագիր» կուսակցության անդամ Հովիկ Աղազարյանի որդին՝ Իվան Աղազարյանը, ՀՅԴ-ական է: Տեղեկությունը Factor.am-ի հետ զրույցում հաստատեց Հովիկ Աղազարյանը:

Ի դեպ, նա ևս նախկին դաշնակցական է: Մեր հարցին՝ ինչպե՞ս է ստացվել, որ մի ընտանիքում հայրն այլ կուսակցությունից է, որդին՝ այլ, արդյոք գաղափարական վեճեր չե՞ն ծագում, Հովիկ Աղազարյանը պատասխանեց. «Իմ որդին՝ Իվան Աղազարյանը, 2005 թվականից դաշնակցական է: Ի՞նչ անի, դուրս գա, մտնի մեր կուսակցությու՞ն (Քաղաքացիական պայմանագիր): Նախկինում ես էլ եմ ՀՅԴ-ական եղել, հեռացել էի, 2005 թվականին որոշեցի վերականգնել, բայց չվերականգնեցին: Պատճառները չգիտեմ, թե ինչու չվերականգնեցին: 2005 թվականից բավականին ժամանակ է անցել, և ես որոշեցի իմ քաղաքական կապիտալը օգտագործել, գնացի այս ճանապարհով»:

Հովիկ Աղազարյանը պատճառ չի տեսնում, որ որդին պետք է դուրս գա ՀՅԴ-ից. «Եթե մենք այսօր իշխանության ենք, դա չի նշանակում, որ իմ տղան պետք է Դաշնակցությունից դուրս գա և միանա մեզ»:

Factor.am-ի հարցին՝ արդյոք շահերի բախում չի՞ լինում, մասնավորապես, արտահերթ ընտրությունների ժամանակ ինչպե՞ս միմյանց դեմ պայքարեցին, Աղազարյանն ասաց. «Այս ընտրություններին իմ տղան իր ձայնը տվեց Դաշնակցությանը: Ես հաստատ կարող եմ ասել, որ ինքը ինձ ձայն չի տվել»:

Հովիկ Աղազարյանը իր՝ ՀՅԴ-ից հեռանալու պատճառների մասին չցանկացավ խոսել:

Հայկ Վարդանյան