Քաղաքականություն
16.01.2019 | 12:08Ազգային ժողովի ԲՀԿ-ական պատգամավոր Գևորգ Պետրոսյանն ԱԺ ամբիոնից խորհրդարանի մթնոլորտը թեժացրած իր գործընկերներին հիշեցրեց՝ «այս դահլիճում պետք է հնչեն բացառապես քաղաքական հայտարարություններ և սա անձնական հարաբերություններ պարզելու տեղ չէ»։
«Բոլորս գիտենք, թե անձնական հարաբերությունները որտեղ պետք է պարզել, ինչ կազմով, ինչ մակարդակում։ Իսկ ինչ վերաբերում է Արման Բաբաջանյանի ելույթին, ապա ես չեմ կարող ասել, որ այնտեղ չկային քաղաքական էլեմենտներ, բայց անվանել այն զուտ քաղաքական՝ չեմ կարող, քանի որ այնտեղ հնչեցին անուններ։ Ես հարգում եմ պատմությունը, բայց պատմությունը ցույց է տալիս երկու բան՝ այն երբեք չի ժպտում այն մարդկանց, որոնք փորձում են ինքնահաստատվել միայն ուրիշների անցյալը վկայակոչելու հաշվին, երկրորդ՝ այն ահռելի տեղեկությունը, որը դուք նոր հանձնեցիք այս լսարանի դատին, չեմ կարծում, որ, ընդամենը, մեկ-երկու օրվա փաստահավաք աշխատանքի արդյունք էր, ենթադրվում է, որ սա շատ երկար ժամանակ կուտակված նյութ էր, ինչը դուք հնարավորություն ունեիք սփռել մինչև Ազգային ժողովի պատգամավոր դառնալը․ այստեղ կա հետին թվով իմաստուն ձևանալու տպավորություն, որը երբեք որևէ մեկին՝ առավելևս ԱԺ պատգամավորին, պատիվ բերել չի կարող»,- ասաց ԲՀԿ-ական պատգամավոր Գևորգ Պետրոսյանը՝ շեշտելով, որ իրենք «Լուսավոր Հայաստան» խմբակցության թշնամի չեն։
«Մի՛ փորձեք սեպ խրել մեր հարաբերությունների մեջ։ Ի վերջո, կա մի ճշմարտություն՝ խավարի մեջ հնարավոր չէ բարգավաճել, իսկ լույսն առանց բարգավաճման անիմաստ է»,- ասաց պատգամավորը։
Մանրամասները՝ տեսանյութում։
