Երկրում ոչինչ չի փոխվել. ՀՀԿ-ին փոխարինել է ՔՊԿ-ն. Զարուհի Փոստանջյան. ՏԵՍԱՆՅՈՒԹ

Անցնող 9 ամիսների ընթացքում Հայաստանում ոչինչ չի փոխվել. ԲՀԿ-ն մնացել է երկրորդ ուժ, իսկ ՔՊԿ-ն փոխարինել է ՀՀԿ-ին: Հունվարի 15-ին տեղի ունեցած ասուլիսի ժամանակ այս մասին ասաց «Երկիր Ծիրանի» կուսակցության նախագահ Զարուհի Փոստանջյանը՝ խոսելով 7-րդ գումարման Ազգային ժողովի, նոր դեմքերի ու ներքաղաքական իրավիճակի մասին:

«Հայաստանում չկա բազմակարծություն, հատկապես՝ խորհրդարանում: Ազգը ներկայացված չէ, և տեղի չեն ունեցել այն բարեփոխումները, որոնց արդյունքում խորհրդարանում պետք է ներկայացված լինեին հանրության բոլոր շերտերը: Այս քաղաքական ուժերի հենց առաջին քվեարկությունը ցույց տվեց, որ մեր երկրում ընդդիմություն չկա, բոլորը նույնակարծիք են»,- նշեց «Երկիր Ծիրանի» կուսակցության առաջնորդը:

Ըստ նրա՝ Հայաստանում ընտրությունների միջոցով բազմակարծիք խորհրդարան ձևավորելն անհնար է, քանի որ նոր կառավարության անդամները «կրում են հին բռնապետերի վերարկուները»: Փոստանջյանը ՔՊԿ-ին «նախկին ՀՀԿ» է անվանում և ընդգծում, որ նոր կառավարության վարած քաղաքականությունը հնին ոչնչով չի զիջում. «Այսօր անգամ բարեգործական հինադրամ է գործում, որի միջոցով գումար է հավաքվում»:

Խոսելով կոռուպցիայի դեմ պայքարի մասին՝ Զարուհի Փոստանջյանը նշեց, որ նոր կառավարության անդամները «կլասիկ կոռուպցիոներներ» են. գործադիր իշխանության ներկայացուցիչը, ճնշում գործադրելով իրավապահ մարմինների՝ ԱԱԾ և ՀՔԾ պետերի նկատմամբ, ցուցումներ է տալիս նրանց, ինչը բացահայտ կոռուպցիայի օրինակ է: Փոստանջյանն անդրադարձավ նաև «Երևան» հիմնադրամի գործունեությանն ու 50 մլն դոլարի շրջանառության չպարզված հանգամանքներին՝ նշելով, որ անգամ ԱԱԾ-ի մուտքը քաղաքապետարան բեմադրված էր:

«Երկիր Ծիրանի» կուսակցության ղեկավարը համոզված է, որ նոր՝ սուպերվարչապետական համակարգը թույլ չի տալու փոփոխություններ տեսնել, քանի որ չկան զսպող ու հակակշռող մեխանիզմներ: Այս ամենի արդյունքում, ըստ նրա, պահպանվելու են նախկին բռնապետական համակարգը, Սահմանադրությունը և օրենքները:

Մանրամասները՝ տեսանյութում:

Նելլի Մելքոնյան