Քաղաքականություն
15.01.2019 | 12:04Ազգային ժողովի «Լուսավոր Հայաստան» խմբակցության նախագահ Էդմոն Մարուքյանի համոզմամբ՝ ԲՀԿ-ական իրենց գործընկերները ԱԺ ընդդիմադիր փոխխոսնակի թեկնածությունների հարցում անում են մեկնաբանություններ և փորձում իրենց հետ վեճի բռնվել, թեև իրենք ասել են, որ ԲՀԿ-ի հետ կռիվ չեն տալիս և իրենց կռիվը քաղաքական մեծամասնության հետ է։
«Մենք կռիվ ենք տալիս մեր թեկնածուի համար, որ նա ընտրվի, և այդ կռվի մեջ դուք մտնում և մեզ հետ կռիվ եք տալիս։ Եթե կռիվ տալու լինի, մենք էլ մեր կռիվը կտանք: Ի վերջո, մեր կուսակցությունից նախարարներին փողոցում չեն հեռացրել և ասել հակահեղափոխականներ։ Հիմա ինչքան ասեք, մենք էլ մերն ենք ասելու, այնպես որ, խնդրում եմ՝ մի՛ մտեք այդ կռվի արանքը»,- իր ելույթում ասաց Էդմոն Մարուքյանը՝ շեշտելով, որ ԱԺ ամբիոնից իրենց խմբակցության պատգամավորների կողմից հնչեցված ելույթները միտված են նրան, որ ներկայացնեն իրենց թեկնածուին և քաղաքական իրողությունները։
Էդմոն Մարուքյանը վստահեցնում է՝ ինչպես բոլոր հարցերում, ընտրության այս հարցում ևս, կա երրորդ ճանապարհ: «Առաջին ճանապարհը ՝ ընտրել տիկին Թանդիլյանին, երկրորդը՝ ընտրել Վահե Էնֆիաջյանին, երրորդը՝ ազատ թողնել՝ ով ում ուզում է թող ընտրի»,- ասաց խմբակցության ղեկավարը։
Անդրադառնալով ԲՀԿ-ական պատգամավոր Նաիրա Զոհրաբյանի՝ ԱԺ երեկվա նիստում հնչեցրած արտահայտությանը, թե իրենց քաղաքական ուժին միտում կա ներքաշել «քասթինգ դեֆիլեների» մեջ, Էդմոն Մարուքյանը պատասխանեց․ ««Քասթինգ դեֆիլեն» չգիտեմ ինչ ա, բայց տիկին Զոհրաբյան, Ձեզ կոչ եմ անում մեր ունեցած ելույթներին չպատասխանել»։
Մանրամասները՝ տեսանյութում։
