«Լավ է, որ մասնագիտությունը, պաշտոնը անցնում է հորից որդուն». Ռուբեն Գևորգյանցի որդին՝ կինոմիության նախագահ ընտրվելու մասին

Կինեմատոգրաֆիստների միության նախկին նախագահ Ռուբեն Գևորգյանցի կյանքից հեռանալուց հետո միության նոր նախագահի ընտրության հարցը բուռն քննարկումների առիթ է դարձել: Մամուլում շրջանառվող  տեղեկությունների համաձայն՝ Կինեմատոգրաֆիստների միության անդամներից շատերը սպասում են, որ առաջիկայում պետք է գումարվի միության համագումար, որի շրջանակում էլ  պետք է վճռվի միության նոր նախագահի հարցը: Սակայն տեղեկություններ կան, որ միության ներկայիս ղեկավարությունը հակված է սեպտեմբերին գումարել վարչության փակ նիստ և Ռուբեն Գևորգյանցի որդուն՝ ռեժիսոր Վահե Գևորգյանցին, նշանակել միության նախագահի ժամանակավոր պաշտոնակատար և այդպիսով մեկ տարով հետատաձգել միության համագումարը: 

Կինոգործիչները մտավախություն ունեն, որ այդ որոշումը կարող է հիմք հանդիսանալ այն բանի, որ  կինոմիության նախագահի պաշտոնը հորից ժառանգաբար փոխանցվի որդուն: Factor.am-ը թեմայի շուրջ զրուցեց Վահե Գևորգյանցի հետ: Նա նշեց, որ օգոստոսի 3-ին կգումարվի միության վերահսկիչ հանձնաժողովի և վարչության նիստը: «Եթե վերահսկիչ հանձնաժողովը որոշի, որ չենք անելու արտահերթ համագումար, վարչությունը կընտրի ժամանակավոր պաշտոնակատար»,- ասաց նա:

Ինչ վերաբերում է կինոմիության նախագահի պաշտոնի՝ հորից որդուն անցնելու վերաբերյալ մեկնաբանություններին, Վ. Գևորգյանցը նկատեց. «Եթե ես զբաղեցնեմ այդ պաշտոնը, այսպես թե այնպես ասելու են, որ այն հորից անցավ տղային: Ես պատրաստ եմ դրան: Կինոմիությունն առաջինը ղեկավարել է իմ պապը՝ Ստեփան Կևորկովը: Դա լավ է, որ մասնագիտությունն անցնում է հորից որդուն»:

Անդրադառնալով մամուլում տարածված այն տեղեկություններին, որ միության առաջին քարտուղար Ռուդոլֆ Ցաթինյանը փորձում է համակիրներ հավաքել, որոնք կպաշտպանեն Վ.Գևորգյանցի թեկնածությունը,  մեր զրուցակիցը  նշեց. «Ուրախ կլինեի, եթե այդպես լիներ: Բոլորն էլ իրար համար բարեխոսում են: Կարծում եք՝ եթե մեկը հավակնի այդ պաշտոնին, ինքը ո՞նց է անելու դա: Բնական է, որ գալու է, մարդկանց հետ հանդիպի, բացատրի, որ իրեն ընտրեն, նախընտրական շրջան է, նորմալ եմ համարում»:

Վ.Գևորգյանցը խոսեց նաև Ազգային կինոկենտրոնի նախկին նախագահ Գևորգ Գևորգյանի՝ միության նախագահի  պաշտոնում ընտրվելու շանսերի մասին: Գևորգյանցը նշեց, որ նա կարող մարդ է և նախագահի պաշտոնում ընտրվելու մեծ հնարավորություն ունի:

Մանրամասները՝ Factor.am-ի տեսանյութում:

Աննա Բաբաջանյան