Իսկ ու՞ր է մեղադրանքը․ նախկին փոխնախարարը նստած սպասում է

«Հարավկովկասյան երկաթուղի» ընկերության գործունեության ընթացքում թույլ տրված չարաշահումների դեպքի առթիվ Հատուկ քննչական ծառայությունում հարուցված քրգործի շրջանակում իր անվան առնչության մասին համացանցից իմացած Տրանսպորտի և կապի նախկին փոխնախարար Արթուր Առաքելյանը սպասում է․ դեռ իր նկատմամբ մեղադրանք չեն առաջադրել։

«Ոչ մի մեղադրանք ինձ դեռ չի առաջադրվել, կարելի է ասել, նստած սպասում եմ, ոչ մի նորություն այդ հարցով չունեմ»,-Factor.am-ի հետ զրույցում ասաց Արթուր Առաքելյանը։

Թե ինչն է պատճառը,  որ «Հարավկովկասյան երկաթուղի» ընկերության գործունեության ընթացքում թույլ տրված չարաշահումների դեպքի առթիվ Հատուկ քննչական ծառայությունում հարուցված քրգործի շրջանակում ՀՔԾ-ն շրջանառեց Արթուր Առաքելյանի անունը, սակայն 2018 թվականի դեկտեմբերից մինչ այսօր այսօր գործով որևէ առաջընթաց չկա, և որևէ մեկին մեղադրանք չի առաջադրվել, Factor.am-ը փորձեց պարզել ծառայությունից։

Մեզ հետ զրույցում ՀՔԾ մամուլի խոսնակ Մարինա Օհանջանյանն Արթուր Առաքելյանին մեղադրանք չառաջադրելու պատճառների մասին տեղեկություններ չհաղորդեց՝ նշելով, որ դեռ այդ մասով որոշում չկա կայացված։

«Քրեական գործի նախաքննությունը շարունակվում է և Արթուր Առաքելյանը մեղադրյալի կարգավիճակ չունի», – ասաց Օհանջանյանը՝ այլ մանրամասներ չհաղորդելով։

Հիշեցնենք, որ 2018 թվականի դեկտեմբերի 17-ին տարածած հաղորդագրության համաձայն՝ ՀՔԾ-ում հարուցված քրեական գործը վերաբերում է փոխնախարարի պաշտոնավարման տարիներին «Հարավկովկասյան երկաթուղի» ընկերության գործունեության ընթացքում թույլ տրված չարաշահումներին:

Իսկ ավելի վաղ Քննչական կոմիտեի տարածած հաղորդագրության համաձայն՝ 2015թ. փետրվարին «Հարավկովկասյան երկաթուղի» ՓԲ ընկերություն ու Տրանսպորտի և կապի նախարարություն է ներկայացվել 2008-2013 թվականների՝ ընկերության ծավալած գործունեության վերաբերյալ աուդիտորական հաշվետվություն, որում արձանագրվել են ընկերության գործունեության հետ կապված ֆինանսական բնույթի մի շարք չարաշահումներ, այդ թվում՝ երկաթուղային ենթակառուցվածքներում կատարված ներդրումներում՝ 428 միլիոն ՀՀ դրամի չկատարված շինարարական աշխատանքներ:

Նախաքննությամբ տվյալներ են ձեռք բերվել առ այն, որ երկաթուղու վարչության գործունեությունը համակարգել է ՀՀ տրանսպորտի և կապի նախարարի տեղակալը (Արթուր Առաքելյան խմբ.), ով «Հարավկովկասյան երկաթուղի» ՓԲ ընկերությունից չստանալով աուդիտորական եզրակացությամբ արձանագրված չարաշահումների և դրանք վերացնելու վերաբերյալ պատճառաբանված պարզաբանումներ և առաջարկություններ, խմբային շահերից ելնելով, աուդիտորական հաշվետվությամբ արձանագրված ֆինանսական չարաշահումները, ներդրումների գործընթացում Կոնցեսիոն պայմանագրով նախատեսված պարտավորությունների բազմաթիվ խախտումները, այդ թվում՝ 428 միլիոն ՀՀ դրամի չկատարված շինարարական աշխատանքների՝ այսինքն ներդրումային գործընթացում կատարված առանձնապես խոշոր չափերի հափշտակության մասին հաղորդում չի ներկայացրել ՀՀ իրավապահ մարմիններին։

Աղավնի Սուքիասյան