16.12.2025 | 16:15
Ամոթ է ուսադիր կրող մարդու համար․ Պապիկյանը՝ պահեստազորի փոխգնդապետի հայտարարության մասին. ՏԵՍԱՆՅՈՒԹ
Ավտոներկրողները հնգօրյա ժամկետում կհանդիպեն վարչապետին. բողոքի ակցիան դադարեցվեց
Հասարակություն
11.01.2019 | 13:53
Ավտոներկրողներին արդեն մի քանի ամիս է՝ անհանգստացնում է 2018 թվականի ամռանը կառավարության ընդունած որոշումը, ըստ որի՝ ավտոմեքենայի նվիրատվությունը պետք է հարկվի: Որոշումից դժգոհ ավտոներկրողները հունվարի 11-ին հերթական բողոքի ակցիան էին նախաձեռնել:
«ՊԵԿ նախագահի պաշտոնում Դավիթ Անանյանի նշանակվելուց հետո հարկային դաշտում գտնվող ավտոներկրողների համար գները միանգամից թանկացան՝ ավելացավ հավելավճար: Օրինակ, եթե ֆիզիկական անձն ԱՄՆ-ից մեքենա է ներկրում, ապա հավելյալ գումար է վճարում՝ մոտ 500 դոլարի չափով»,- նշում Ավտովարորդների պաշտպանության լիգայի նախագահ Տիգրան Հովհաննիսյանը:
Օրենքի կիրառման արդյունքում բոլոր նվիրատվությունները դիտարկվելու են ապօրինություն և իրականացվելու են համապատասխան գանձումներ: Տիգրան Հովհաննիսյանի խոսքով՝ ՊԵԿ-ն ինքն է ավտոներկրողներին ապօրինությունների դրդել, հիմա էլ տուգանում է:
Ավտոներկրողները ՊԵԿ նախագահին քննադատում են իրենց շուրջ 1 մլն դոլարի վնաս հասցնելու, ինչպես նաև նախորդ տարվա ընթացքում հսկիչ գներից 30% պակաս մաքսազերծումը վերացնելու համար: 2019-ի համար էլ մաքսազերծման գներն ավելացել են շուրջ 500 դոլարով:
Արդեն 6 ամիս է՝ ավտոներկրողները բողոքի ակցիաներ են կազմակերպում, սակայն, վստահեցնում են, ՊԵԿ նախագահի՝ մաքսային գծով տեղակալն առաջին անգամ միայն երեկ է ավտոմաքսատուն այցելել:
Տիգրան Հովհաննիսյանը շեշտում է, որ ոստիկանապետ Վալերի Օսիպյանը դեռ Ամանորից առաջ վարչապետի պաշտոնակատար Նիկոլ Փաշինյանի հետ հանդիպում է խոստացել: Կեսօրից Բրազիլիայի հրապարակում հավաքված ցուցարարները սպասում էին ոստիկանության Երևանի քաղաքային վարչության պետի տեղակալ Էդգար Պետրոսյանին, նշելով, որ եթե չգա հանդիպման, ավտոերթով կշարժվեն դեպի կառավարության շենք:
Շուրջ 1.5 ժամ անց ցուցարարներին մոտեցած Էդգար Պողոսյանն ավտոներկրողների հետ հանդիպմանը խոստացավ մինչև հունվարի 16-ը Նիկոլ Փաշինյանի հետ հանդիպում կազմակերպել: Ակցիայի մասնակիցները համաձայնեցին սպասել:
Ցուցարարների պահանջը մնում է նույնը. ավտոներկրողների համար մաքսազերծման գների իջեցում և վարչապետ պաշտոնակատարի հետ խոստացված հանդիպման կազմակերպում, որի ընթացքում կներկայացնեն իրենց բողոքներն ու առաջարկները՝ կապված մաքսային դրույքաչափերի հետ: Ցուցարարների խոսքով՝ Նիկոլ Փաշինյանի հետ հանդիպումը չկայանալու դեպքում կվերսկսեն բողոքի գործողությունները:
