Ինչո՞ւ են հապաղում ՌԴ իրավապահները և չեն հայտնաբերում հետախուզման մեջ գտնվող Վահագն Հարությունյանին

Առաջին ատյանի դատարանը դեկտեմբերի 30-ին  բավարարել է Հատուկ քննչական ծառայության ներկայացրած միջնորդությունը «Մարտի 1-ի» գործով քննչական խմբի նախկին ղեկավար Վահագն Հարությունյանին կալանավորելու վերաբերյալ։

Վահագն Հարությունյանը տևական ժամանակ է գտնվում է Ռուսաստանում, և նրա նկատմամբ հայտարարվել է հետախուզում, և թեև Հարությունյանն իր գտնվելու վայրից՝ Ռուսաստանից, ավելի վաղ սկայպի միջոցով հարցազրույց էր տվել, սակայն մինչ օրս նրան հայտնաբերող մարմինը չի հայտնաբերել վերջինիս։

Factor.am-ին  ՀՀ գլխավոր դատախազության  հանրային կապերի բաժնի պետ Արևիկ Խաչատրյանը փոխանցեց, որ ՀՀ դատախազությունը պաշտոնապես տեղեկացված չէ որևէ երկրի տարածքում Վահագն Հարությունյանի հայտնաբերման վերաբերյալ: Իսկ մեղադրյալի էքստրադիցիայի իրավական ընթացակարգը սկսվում է, երբ հետախուզվող մեղադրյալը հայտնաբերվում է:

Ստացվում է Վահագն Հարությունյանին հայտնաբերող մարմինը՝ ՌԴ իրավապահները, դեռ ՀՀ գլխավոր դատախազությանը չեն տեղեկացրել, որ գտել են Հարությունյանին, որից հետո նոր Գլխավոր դատախազությունը կկարողանա դիմել ՌԴ-ին՝ Հարությունյանին Հայաստանին հանձնելու պահանջով։

Factor.am-ի հետ զրույցում Վահագն Հարությունյանի պաշտպան Միհրան Պողոսյանը նշեց, որ պաշտպանական կողմը բողոքարկել է Հատուկ քննչական ծառայության՝ հետախուզում հայտարարելու որոշումը։

«Մենք գտնում ենք , որ Հարությունյանի նկատմամբ հայտարարված հետախուզումը անօրինական է, ՀՔԾ-ի որոշումը բողոքարկված է, դատական նիստը կկայանա հունվարի 25-ին։ Նշեմ, որ արդեն դատական նիստ այս հարցով  կայացել է, որին թեև պատշաճ ծանուցված են եղել ՀՔԾ-ն և Գլխավոր դատախազությունը, սակայն դատական նիստին չեն ներկայացել՝ իրենց բերած պատճառաբանության համաձայն՝ ծանրաբեռնվածության պատճառով»,- ասաց պաշտպանը։

Հարցին՝ արդյոք բողոքարկված հետախուզման որոշումն է պատճառը, որ ՌԴ իրավապահ մարմինները հապաղում են Վահագն Հարությունյանին հայտնաբերելու հարցում, պաշտպանը պատասխանեց․ «Միանշանակ պատասխան տալ այդ հարցին չեմ կարող»։

Աղավնի Սուքիասյան