Քաղաքականություն
10.01.2019 | 20:13ԱԺ «Լուսավոր Հայաստան» խմբակցության պատգամավոր Մանե Թանդիլյանը Factor.am-ի հետ զրույցում «նոնսենս» համարեց «Իմ քայլը»-ԲՀԿ համագործակցության հնարավոր հուշագրի ստորագրումը: Նշենք, որ այդ մասին տեղեկություն է շրջանառվում մամուլում:
«Բավական հետաքրքիր է տեսնել, թե ինչպես է հուշագիր ստորագրած ուժը դիրքավորվելու որպես ընդդիմադիր, և «Իմ քայլն» էլ ընտրելու է այդ անհասկանալի իրավիճակում ընդդիմադիր փոխխոսնակ»,- տարակուսանք հայտնեց Թանդիլյանը՝ նշելով, որ ինքը ևս լսել է հնարավոր հուշագրի մասին խոսակցություններ:
«Ես շատ կուզենամ, որ ընդդիմադիր դաշտը չշարունակվի ապականվել, որովհետև դա ուղղակի նոնսենս է. կա՛մ դու կոալիցիայի մեջ ես և իշխանություն ես, կա՛մ կոալիցիայի մեջ չես և ընդդիմություն ես: Փոխխոսնակի պաշտոնի համար չկազմել կոալիցիա կամ ինչ-որ աղավաղված պրոցեսներ ներկայացնել հանրությանը: Ես կարծում եմ՝ պետք է հրաժարվել քայլերից, որոնք բնորոշ էին ՀՀԿ-ի իշխանությանը»,- նշեց Թանդիլյանը:
Նրա խոսքով՝ այդ պարագայում թուլանալու է ընդդիմությունը. «Շատ վատ է, որ իշխանությունն ունենում է լծակ ընդդիմության վրա»:
Հակադարձելով Նիկոլ Փաշինյանի հայտարարությանը, թե սկզբունքն այն է, որ ընդդիմությունից ԱԺ փոխնախագահ ընտրվի ամենաշատ ձայներ հավաքած ուժի ներկայացուցիչը, ինչն այսօր գրեթե կրկնել է նաև ԱԺ նախագահի թեկնածու Արարատ Միրզոյանը, «Լուսավոր Հայաստանի» թեկնածու Մանե Թանդիլյանն ասաց. «Սահմանադրությունը թույլ է տալիս ընդդիմադիր պատգամավորին ընտրել որպես ընդդիմադիր ուժի փոխխոսնակ, և այստեղ չի նշվում, որ անպայման դա պետք է լինի հաջորդ խոշոր ուժը: Պետք է հիասթափեցնեմ Նիկոլ Փաշինյանին և իմ գործընկերներին, որ այդ սկզբունքը, ըստ էության, հնարածին սկզբունք է, որը կարելի է, իհարկե, որդեգրել և փաթեթավորել սեփական ընտրությունը, բայց պետք է բոլորս հասկանանք, որ մեր ժողովուրդն ընտրել է իշխանություն, որը պետք է ինքն ընտրի ընդդիմադիր փոխխոսնակ: Ժողովուրդն իրենց է լիազորել, որ ընտրեն ընդդիմադիր փոխխոսնակ»:
Մանե Թանդիլյանի խոսքով՝ ինքը շատ կցանկանա, որ «Իմ քայլի» իր գործընկերները «չգնան ՀՀԿ-ի հետքերով ու այդ փաթեթավորումները չներկայացնեն», քանի որ իրենք են կատարելու ընտրություն և իրենք են որոշելու, թե ընդդիմադիր թեկնածուներից ով է լինելու փոխխոսնակ:
Հարցին, թե ինչպե՞ս է քննադատելու իշխանությանը, երբ ընդամենը մեկ ամիս առաջ ինքն էր այդ իշխանության կազմում, Թանդիլյանն ասաց, որ պաշտոնավարել է 6 ամիս, այդ ընթացքում ականատես է եղել բազմաթիվ վրիպումների, բացթողումների և սխալների, որոնց մասին խոսելն անհրաժեշտ է:
«Եվ մենք դա անելու ենք ամենայն պատվով, որովհետև դրանց մասին լռելն անթույլատրելի է, և միայն բարձրաձայնելն է բերելու որակական և դրական լուծումների: Պետք է ասել, որ կառավարությանն անհրաժեշտ էր տալ ժամանակ, և այդ ժամանակը արդեն բավարար էր»,- նշեց նախկին նախարարը:
Հարցազրույցի մանրամասները՝ տեսանյութում
Մարինե Խառատյան
