«Սփյուռքի նախարարության լուծարումը բացասական արձագանք կստանա սփյուռքում». Արամ Ա-ն նամակ է հղել Նիկոլ Փաշինյանին

Մեծի Տանն Կիլիկիո Արամ Ա կաթողիկոսն արժևորում է ՀՀ սփյուռքի նախարարության կատարած աշխատանքը: Նա հույս ունի, որ նոր կառավարության գործունեության մեջ սփյուռքն առաջնային տեղ կունենա: Այս մասին Արամ Ա-ն ասել է «Երկիր մեդիա» հեռուստաընկերության «Երկիրն այսօր» լրատվականին տված հարցազրույցում:

«Ես կարծում եմ, որ, նկատի ունենալով Սփյուռքի նախարարության գոյության ռազմավարական, միաժամանակ՝ խորհրդանշական իմաստը, սփյուռքի համար կարևոր է ունենալ Սփյուռքի նախարարություն»,- ասել է Մեծի Տանն Կիլիկիո կաթողիկոսը՝ ընդգծելով, որ երբեմն խորհրդանշական իմաստը շատ ավելի կենսական է, քան ռազմավարականը կամ քաղաքականը:

Կաթողիկոսի խոսքով՝ Սփյուռքի նախարարության լուծարումը կարող է բացասական արձագանք ստանալ սփյուռքի հայերի շրջանում:

«Մեր մոտեցումը տարբեր պետք է լինի սփյուռքի նկատմամբ, որովհետև եթե շուրջ 3 միլիոն հայություն ունենք Հայաստանում, մնացած հայությունը՝ 7-8 միլիոն, ապրում է սփյուռքում: Հետևաբար, սա շատ կարևոր է մեզ համար, միաժամանակ, պետք է նայենք Հայաստանի վարչակազմակերպչական դրությունը: Անցնող տարիների ընթացքում Սփյուռքի նախարարությունը հսկայական գործ է կատարել, և նախ պետք է մեր գնահատանքն արտահայտենք»,- ասել է Արամ Ա-ն:

Նշենք, որ Մեծի Տանն Կիլիկիո կաթողիկոսը նամակ է հղել վարչապետի պաշտոնակատար Նիկոլ Փաշինյանին՝ արժևորելով Սփյուռքի նախարարության կատարած աշխատանքը և հույս հայտնելով, որ նոր կառավարության աշխատանքներում նույնպես սփյուռքն առաջնային կլինի: