16.01.2025 | 23:17
Առաջիկայում տեղի կունենա Վրաստանի, Ադրբեջանի և Թուրքիայի ԱԳ նախարարների հանդիպում
Ե՞րբ տեղի կունենա վարչապետի նշանակումը և ի՞նչ ընթացակարգով
Քաղաքականություն
09.01.2019 | 14:28
Նախագահ Արմեն Սարգսյանը հունվարի 14-ին կստորագրի վարչապետի պաշտոնակատար Նիկոլ Փաշինյանին վարչապետ նշանակելու հրամանագիրը: Համաձայն Սահմանադրության՝ Հանրապետության նախագահը նորընտիր Ազգային ժողովի լիազորությունների ժամկետն սկսվելուց հետո անհապաղ վարչապետ է նշանակում Սահմանադրության 89-րդ հոդվածով սահմանված կարգով ձևավորված խորհրդարանական մեծամասնության ներկայացրած թեկնածուին:
«Իմ քայլը» խմբակցության պատգամավոր, ՔՊ վարչության անդամ Վահագն Հովակիմյանը Factor.am-ի հետ զրույցում պարզաբանեց՝ 7-րդ գումարման Ազգային ժողովի առաջին նիստի օրը՝ հունվարի 14-ին, հենց նիստը մեկնարկի, ապա կհամարվի, որ նոր ձևավորված ԱԺ-ն ստանձնել է լիազորությունները, ուստի այդ պահից սկսած խորհրդարանական մեծամասնության ներկայացրած թեկնածուի հետ կապված գրություն կուղարկվի նախագահ Սարգսյանին: Նախագահն անհապաղ կստորագրի վարչապետի նշանակման մասին հրամանագիրը:
Հիշեցնենք՝ արտահերթ ընտրությունների արդյունքում Ազգային ժողով անցած երեք քաղաքական ուժերից համոզիչ հաղթանակ է տարել Նիկոլ Փաշինյանի առաջնորդած «Իմ քայլը» դաշինքը: Խորհրդարանում Փաշինյանի ղեկավարած դաշինքը կունենա 88 պատգամավոր: Պատգամավորների այս թիվը բավարար է անգամ սահմանադրական մի շարք օրենքներ ընդունելու համար, այսինքն՝ քաղաքական մյուս երկու ուժերի՝ ԲՀԿ-ի և «Լուսավոր Հայաստանի» աջակցությունն անհրաժեշտ չի լինի:
«Քաղաքացիական պայմանագիր» կուսակցության մամուլի խոսնակ Վահան Կոստանյանը Factor.am-ին փոխանցեց՝ «Իմ քայլը» դաշինքի վարչապետի թեկնածուն Նիկոլ Փաշինյանն է լինելու: Իհարկե, այս մասին Փաշինյանը ևս խոսել է ողջ քարոզարշավի ընթացում՝ նշելով, որ եթե քաղաքացիները ցանկանում են կրկին իրեն տեսնել վարչապետի պաշտոնում, ապա պետք է իրենց քվեն տան «Իմ քայլը» դաշինքին:
Այսպիսիով՝ ութ ամսվա ընթացքում արդեն երկրորդ անգամն է՝ ինչ Արմեն Սարգսյանը հրամանագիր է ստորագրելու Նիկոլ Փաշինյանին ՀՀ վարչապետ նշանակելու մասին:
Ի դեպ, մեկ անգամ էլ Փաշինյանն առաջադրվել, սակայն չէր ընտրվել:
