12.11.2024 | 23:27
Գրետա Թունբերգը ժամանել է Հայաստան
ԱՄՆ Սենատն արգելափակել է ՌԴ-ի, Սիրիայի և Իրանի դեմ պատժամիջոցների օրինագիծը
Քաղաքականություն
09.01.2019 | 11:42
ԱՄՆ Սենատը չի կարողացել քվեարկել Սիրիայի կառավարությանն օգնություն ցուցաբերելու համար պատժամիջոցներ նախատեսող օրինագիծը: «Մերձավոր Արևելքում Ամերիկայի անվտանգության ամրապնդում» անվանումով փաստաթուղթը սատարել է հարյուր սենատորների երկու երրորդից պակաս օրենսդիր, գրում է ՌԻԱ Նովոստին:
Դեմոկրատներն ի սկզբանե հայտարարել են, որ չեն քվեարկի որևէ օրինագծի օգտին, որն ուղղված չէ «շաթդաունի» դադարեցմանը: Արդյունքում Սենատում հանրապետականների առաջնորդ Միթչ Մաքքոնելին փաստաթուղթը նոր քննարկման է ուղարկել:
Նշենք, որ ԱՄՆ դաշնային մի շարք գերատեսչություններ բյուջեի բացակայության պատճառով դեկտեմբերի 22-ից չեն աշխատում կամ աշխատում են մասնակի: Դոնալդ Թրամփը պահանջում է, որ դաշնային բյուջեում 5.6 մլրդ դոլար նախատեսվի Մեքսիկայի հետ սահմանին պատ կառուցելու համար, սակայն դեմոկրատները դեմ են:
Իսկ Սենատի կողմից չընդունված օրինագիծը պատժամիջոցներ է նախատեսում Սիրիայի, ինչպես նաև այդ երկրի մերձավոր դաշնակիցներ Ռուսաստանի և Իրանի նկատմամբ՝ Դամասկոսին ռազմական և այլ օգնություն ցուցաբերելու համար:
Օրինագծով Ռուսաստանն ու Իրանը մեղադրվում են Սիրիայի իշխանությունների հետ միասին խաղաղ բնակչության և քաղաքացիական օբյեկտների դեմ ավիահարվածներ հասցնելու, բնակավայրերը պաշարելու և մարդասիրական օգնության մատակարարմանը խոչընդոտելու համար:
