Ընդհանրապես արգելել նման միջոցառումները, մենք գտնում ենք՝ ճիշտ չէ․ Արտակ Դավթյանը՝ բանակ ուղարկվող ծանրոցների մասին

Ինչպես ամեն տարի, այնպես էլ` 2019 թվականի զորակոչի ընթացքում մեծ ուշադրություն ենք դարձնելու նորակոչիկների առողջությանը, իսկ քանի որ ձմեռ է՝ հատուկ ուշադրության կենտրոնում է նորակոչիկներին անվտանգ իրենց զորամասերը տեղափոխելու խնդիրը։ Այս մասին այսօր՝ հունվարի 8-ին, ձմեռային զորակոչի առաջին օրը, լրագրողների հետ ճեպազրույցում ասաց ՀՀ ԶՈՒ Գլխավոր շտաբի պետ Արտակ Դավթյանը։

Անդրադառնալով նորակոչիկներին տրվող կոշիկներին և համազգեստին՝ Արտակ Դավթյանը նշեց, որ այս զորակոչի ընթացքում էլ նորակոչիկները կստանան այն կոշիկները, որոնք մինչ այժմ բաժանվում են զինվորներին։ «Ինչ վերաբերում է համազգեստին, ապա կլինի փոփոխություն՝ դրա կտորի որակի հետ կապված»,- ասաց Դավթյանը։

Հարցին՝ արդյոք զինվորներին ծանրոցներ ուղարկելու պրակտիկան բացառվելո՞ւ է, Արտակ Դավթյանը պատասխանեց․ «Այն, ինչ մենք տալիս ենք զինծառայողներին,  բավարար է նրանց կեցությունն ապահովելու համար։ Սակայն պետք է նշեմ, որ բանակ են զորակոչվում տարբեր սոցիալական խմբերի զինվորներ, և կա մեկը մյուսից ետ չմնալու խնդիր։ Պետք է հասկանալ, թե ինչու է ծնողը ծանրոց ուղարկում բանակ։ Եթե կա համազգեստի հետ կապված խնդիր, ապա պատրաստ ենք դա քննարկել, նախկինում նման խնդիր կար, որի հետևանքով  համազգեստի տրամադրման ժամկետները փոխվեցին, զինվորներին տրամադրվող ներքնաշորերը փոխվեցին, զինվորները ստանում են նաև գումար՝ առաջին անհրաժեշտության հիգիենիկ պարագաներ գնելու համար։ Ընդհանրապես արգելել նման միջոցառումները, մենք գտնում ենք՝ ճիշտ չէ․ բայց եկեք հասկանանք պատճառները՝ դա զինվորին պե՞տք է, թե՝ պետք չէ»։

Խոսելով բանակում շահագործվող անսարք մեքենաների մասին՝  Արտակ Դավթյանը նշեց․ «Վերջին 4 տարվա ընթացքում Զինված ուժերը համալրվել է 2000 մեքենայով, դրան զուգահեռ շահագործումից դուրս են հանվում անսարք մեքենաները։ Սակայն բացառել, որ անսարք տեխնիկա կարող է շահագործվել, որևէ մեկը չի կարող։ Սակայն ամեն ինչ ավում է դա բացառելու համար։ Այն ցավալի դեպքից հետո այդ վերահսկողությունն ավելի է խստացվել»։

Աղավնի Սուքիասյան