Երևանում ամենուր «տոնական» աղբ է. Հայկ Մարությանի հանձնարարականը չի կատարվել. ԼՈւՍԱՆԿԱՐՆԵՐ

Տոնական Երեւանում աղբն անպակաս է: Կենցաղային աղբի կուտակումներ Factor.am-ը ֆիքսել է մայրաքաղաքի չորս վարչական շրջաններում:

Մեղմ ասած` այս օրերին էլ աղբահանությունն անթերի չի կատարվում, որպեսզի գոնե այս ընթացքում քաղաքը ամանորյա զարդարանքին համահունչ լինի: Այս ամենի համատեքստում ուշագրավ է հիշել Երեւանի քաղաքապետ Հայկ Մարությանի՝ դեկտեմբերի 24-ին արած հայտարարությունը:

Մասնավորապես, տարեվերջյան այդ խորհրդակցության ժամանակ քաղաքապետը կոմունալ ծառայություններին, վարչական շրջանների ղեկավարներին և «Սանիթեք» ընկերությանը հանձնարարել էր աղբահանության կազմակերպումն ապահովել լրացուցիչ հատուկ ժամանակացույցով: «Կապված տոների հետ, բնականաբար, աղբը մայրաքաղաքում ավելի շատ կլինի և այստեղ շատ լուրջ աշխատանք պետք է տանել: Եթե նախկինում աղբը հավաքվում էր ավելի քիչ ժամանակահատվածում, այդ օրերին ավելի արագ է հավաքվելու: Այնպես որ, պետք է ավելի շատ աշխատել»,- Երևանի քաղաքապետարանի աշխատակազմի տեղեկատվության և հասարակայնության հետ կապերի վարչության փոխանցմամբ՝ ընդգծել էր քաղաքապետ Մարությանը:

Factor.am-ը մի քանի ժամ շրջեց Արաբկիր, Կենտրոն, Աջափնյակ եւ Դավիթաշեն վարչական շրջաններով, պարզելու համար՝ արդյո՞ք քաղաքապետի հանձնարարականը իրականացվել է: Սակայն ականատես եղանք մի տեսարանի, որը նորություն չէ․ աղբ՝ որքան ուզես, եւ որտեղ ուզես:

Ի դեպ, Factor.am-ի նկարահանումների ժամանակ՝ 16:30-ի սահմաններում, «Սանիթեք» ընկերությունը աղբահանություն էր իրականացնում Կոմիտասի պողոտայում: Մենք նկարահանումներ իրականացնելով բարձրանում էինք, իսկ «Սանիթեք» ընկերությունն աղբահանություն իրականացնելով իջնում, եւ ֆիքսեցինք, որ «Սանիթեքի» աշխատակիցները ոչ բոլոր աղբամաններն էին դատարկում, իսկ դատարկված աղբամանների մոտ էլ աղբի մնացորդներ էին թողնում:

Հանուն արդարության նշենք, որ մեր նկարահանումների ընթացքում կատարյալ մաքրություն էր տիրում Բաղրամյան եւ Տիգրան Մեծ պողոտաներում: Դավիթաշեն եւ Աջափնյակ վարչական շրջաններում էլ տխուր էր երկրորդական փողոցների պատկերը, շենքերի բակերից աղբը մի քանի օր է՝ հեռացված չէ:

Նույն իրավիճակն էր տիրում նաեւ Արաբկիր վարչական շրջանում: Ստացվում է, որ կոմունալ ծառայությունների, վարչական շրջանների ղեկավարների և «Սանիթեք» ընկերության կողմից այդպես էլ քաղաքապետ Հայկ Մարությանի հանձնարարականը չի կատարվել։

Հայկ Վարդանյան