10.12.2025 | 16:34
ՊՆ արտաբյուջետային հաշիվը փակվում է․ գումարի մնացորդը կփոխանցվի ՀՀ պետական բյուջե
Դավիթ Պետրոսյանը համալսարանից ոչ թե հեռացվել է, այլ ինքն է հեռացել
Հասարակություն
28.12.2018 | 11:31
«Հրապարակ» օրաթերթն այսօր գրել էր, որ «ԵՊՀ Ռեստարտ» ուսանողական շարժման ղեկավար Դավիթ Պետրոսյանը, որը սովորում էր ԵՊՀ Եվրոպական ուսումնասիրությունների կենտրոնում, անցած շաբաթ հեռացվել է բուհից՝ դասերից բացակայության ու միջանկյալ քննությունները չհանձնելու պատճառով:
Դավիթ Պետրոսյանը, սակայն, Factor.am-ի հետ զրույցում հերքեց այդ լուրերը, ասելով, որ համալսարանը լքել է սեփական դիմումի համաձայն․ «Ես դիմումս երկու ամիս առաջ եմ գրել, իմ քննությունները ես նորմալ հանձնել եմ, բացականեր էլ չեմ ունեցել»։
Նրա պնդմամբ՝ համալսարանը լքելու պատճառը երկրից որոշ ժամանակով հեռանալու ծրագրերն ու աշխատանքային զբաղվածությունն է եղել։
Ի դեպ այն, որ Դավիթ Պետրոսյանը ոչ թե հեռացվել է, այլ համալսարանից դուրս է եկել սեփական դիմումի համաձայն «Հրապարակ» օրաթերթին ասել էր նաև ԵՊՀ մամուլի խոսնակ Գևորգ Էմին-Տերյանը. «Նա ոչ թե դուրս է մնացել, այլ դիմում է գրել ու դուրս եկել»,- նշել էր նա:
Հարցին, թե հնարավոր է հետագայում կրկին շարունակի ուսումը ԵՊՀ-ում, Դավիթ Պետրոսյանը պատասխանեց․ «Ես մագիստրատուրաս ցանկանում եմ շարունակել արտերկրում, այն ինչը ես ցանկանում եմ սովորել, իրենք ինձ չեն կարող տալ»։
Ուսանողական շարժման ղեկավարից նաև ճշտեցինք, արդյոք համալսարանը լքելուց հետո էլ կշարունակի պայքարել ԵՊՀ-ում առկա խնդիրների լուծման համար․ «Այո, պայքարը կշարունակվի, դա բացարձակապես կապ չունի համալսարանը լքելու որոշմանս հետ»։
Լիլիթ Շաբոյան
