Տպավորություն է, որ այլմոլորակայինները եկել, պետական կառույցները վերցրել տարել են․ Տիգրան Հեքեքյան

Արամի 23 շենքի սեփականատեր «Հայաստանի փոքրիկ երգիչներ» նվագախմբի գեղարվեստական ղեկավար Տիգրան Հեքեքյանը հայտարարում է, որ շենքի վթարային վիճակը գնալով ավելի վտանգավոր է դառնում, և չնայած գրվել են բազմաթիվ նամակներ՝ ՀՀ վարչապետից մինչև ԱԻՆ, սակայն միևնույնն է՝ 4-րդ կարգի վթարային այս շենքի վերանորոգման հետ կապված որևէ քայլ չի արվում։

«Բազմաթիվ նամակներով ահազանգել ենք այդ մասին։ Ոչ շատ վաղ անցյալում վարչապետի պաշտոնակատար Նիկոլ Փաշինյանն այցելել էր մեր շենք, իսկ դա նշանակում էր, որ իշխանության ամենաբարձր պաշտոնյան անհանգստացած է։ Նամակ գրեցինք նաև վարչապետի աշխատակազմի ղեկավար Էդուարդ Աղաջանյանին, Քաղաքաշինության պետական կոմիտեի ղեկավար  Ավետիք Էլոյանին, Երևանի գլխավոր ճարտարապետ Արթուր Մեսչյանին, քաղաքապետ Հայկ Մարությանին և նամակում հավելեցինք, որ վարչապետը  հայտնել է, որ շենքը չի քանդվելու և այն պետք է շտապ վերականգնել։ Նշեցինք նաև, որ պահանջում ենք հարցին տալ վերջնական լուծում, այլապես կնշանակի, որ չի կատարվել վարչապետի հանձնարարականը»,- ասաց Տիգրան Հեքեքյանը՝ նշելով, որ իրենց կողմից գրված նամակին պատասխանել է միայն Քաղաքաշինության պետական կոմիտեն։

«Արել են առաջարկ շենքի պատը փակել մոմլաթով, որպեսզի խոնավություն չանցնի ո՛չ շենքի պատին, ո՛չ հողին»,- ասաց Հեքեքյանը՝ մանրամասնելով, որ ինքը որպես շենքի սեփականատեր այդ տարբերակը մերժել է և առաջարկել է մի քիչ գումար ավել ծախսել և շենքը ամրացնել ժամանակակից մեթոդներով։

Տիգրան Հեքեքյանը նշեց նաև, որ քաղաքապետարանից ստացել են առաջարկ՝ ցանկացած վերանորոգման աշխատանք իրականացնել այն ընկերության համաձայնությամբ, որը հանդիսանում է շենքն այդ վիճակին հասցնողը, հետևաբար՝ ամիսներ շարունակ փոխադարձ նամակագրությունների  արդյունքում որևէ պատասխան գործողություն տեղի չի ունենում: «Այնպիսի տպավորություն է, որ անապատում ենք, այլմոլորակայինները եկել, պետական կառոյցները վերցրել տարել են․ նամակ ես գրում, պատասխան չկա»,- ասաց Տիգրան Հեքեքյանը։

Քննարկման մասնակից Պատմության և մշակույթի հուշարձանների պահպանության գործակալության պետ Արմեն Աբրոյանը Արամի 23 շենքի հետ կապված նշեց, որ օրենքով սահմանված է, որ հուշարձան վնասող անձը պարտավոր է վերականգնել այն. «Մի՞թե դժվար է գտնել՝ ով է իրականացրել այդտեղ շինարարություն, ով արել է, նա էլ  պետք է հուշարձանին հասցված վնասը վերականգնի։ Ես հորդորում եմ գործող քաղաքապետին՝ լուծումներ գտնել ու լուծոըմներ պետք է գտնել ոչ թե սեփականատիրոջ համաձայնությամբ, այլ սեփականտիրոջը պարտավորեցնելով»։

Մանրամասները՝ տեսանյութում։