10.10.2026 | 18:18
ԶՈՒ ԳՇ պետն այցելել է մի շարք զորամասեր
Ալեքսանյանը երշիկ էր տալիս, Սասի Արտակը՝ խմիչք. Ազգային ժողովի աշխատակազմը զրկվել է օլիգարխների նվերներից
20.12.2018 | 20:30
Ազգային ժողովում Նոր տարվա նախաշեմին այնքան էլ տոնական տրամադրություն չկա: Խորհրդարանի որոշ աշխատակիցներ, որոնց աշխատավարձը շատ ցածր է, մեզ հետ ունեցած մասնավոր զրույցներում փոխանցեցին, որ ամենամյա նվերներից այս տարի զրկվել են:
Բանն այն է, որ օլիգարխներն արդեն պատգամավորներ չեն և խորհրդարանի աշխատակազմին իրենց բիզնեսներից բաժիններ չեն հանում: Ազգային ժողովի աշխատակիցներից մի քանիսը մեզ հետ զրույցում ասացին, որ նախկինում Նոր տարվա շոկոլադները և ամանորյա պարկերը նվիրել է «Գրանդ Քենդի» ընկերությունը: Այս ամենն ապահովում էր ՀՅԴ խմբակցության պատգամավոր Արմեն Բաբայանը, քանի որ նախկինում եղել է այս ընկերության տնօրենը:
Խմիչքներով, երշիկեղեն-մսեղենով, կաթնամթերքով ԱԺ աշխատակիցներին ապահովելու խնդիրն էլ դրված է եղել ՀՀԿ-ական խմբակցության նախկին պատգամավոր Սամվել Ալեքսանյանի վրա: Նա այդ ամենը տրամադրում էր իր ընտանիքին պատկանող «Երևան-Սիթի» սուպերմարկետներից:
Իսկ ահա Նոր տարվա խմիչքը տրամադրել է Արտակ Սարգսյանը՝ իր «ՍԱՍ» սուպերմարկետների ցանցից:
«Ռոյալ Արմենիա» ընկերությունն էլ տարեվերջին սուրճ էր նվիրում աշխատակիցներին:
Ազգային ժողովի աշխատակազմից մեզ փոխանցեցին, որ այդ նվերները պատգամավորների ցանկությունն է եղել և ոչ թե պարտադիր պայման: «Դա պարտադիր բան չէ, որ ինչ-որ մեկն իր վրա վերցնի: Ամեն մարդ ազատ է նման որոշումներ կայացնելիս»,- փոխանցեցին խորհրդարանի աշխատակազմից:
Հայկ Վարդանյան
