Գլխավոր դատախազության արձագանքը Էդմոն Մարուքյանին վերաբերող Վահե Էնֆիաջյանի գրառմանը

«Դեռևս 2014 թվականին ՀՀ գլխավոր դատախազությունն անդրադարձել է Ազգային ժողովի պատգամավոր, «Լուսավոր Հայաստան» կուսակցության առաջնորդ Էդմոն Մարուքյանի կողմից փաստաթղթեր կեղծելու միջոցով պատգամավոր ընտրվելու մասին մամուլում տեղ գտած հրապարակումներին»,- պատասխանելով Factor.amի հարցին՝ արդյոք ուսումնասիրության առարկա կդառնա՞ «Բարգավաճ Հայաստան» կուսակցության անդամ Վահե Էնֆիաջյանի գրառումն՝ ասաց դատախազության հանրային կապերի բաժնի պետ Արևիկ Խաչատրյանը:

Հիշեցնենք՝ օրերս ԲՀԿ-ական Վահե Էնֆիաջյանը գրառում էր կատարել իր ֆեյսբուքյան էջում՝ կարծիք հայտնելով, որ Էդմոն Մարուքյանը պետք է զրկվի պատգամավորական մանդատից, քանի որ նա 2012 թվականի խորհրդարանական ընտրությունների ժամանակ պետական մի շարք փաստաթղթերի կեղծմամբ է պատգամավոր ընտրվել:

«Օրվա բոլոր ժամերին արդարությունից, ազնվությունից և օրենքից խոսող, նախկին իրավապաշտպան Էդմոն Մարուքյանը, պարզվում է, շարքային հանցագործ է, ով Ազգային Ժողովի որոշմամբ պետք է զրկվի պատգամավորական մանդատից։ 2012 թվականի խորհրդարանական ընտրությունների ժամանակ Մարուքյանը պատգամավոր է ընտրվել՝ կեղծելով պետական մի շարք փաստաթղթեր և իր հովանավորների հետ միասին քրեական հանցագործության է դրդել Ոստիկանության անձնագրային ծառայությանն ու Ազգային Անվտանգության ծառայությանը»,- գրել էր Էնֆիաջյանը:

Էդմոն Մարուքյանն, իհարկե, այս առնչությամբ պարզաբանմամբ հանդես եկավ՝ հիշեցնելով, որ հարցն առաջին անգամը չէ, որ դառնում է քննարկման առարկա: Գլխավոր դատախազության հանրային կապերի բաժնի պետը ևս հաստատեց՝ 2014 թվականին նույնաբովանդակ հրապարակումներ եղել են մամուլում և Դատախազությունը դրանք ուղարկել է Հատուկ քննչական ծառայություն՝ ուսումնասիրություն իրականացնելու նպատակով: Այնուհետև ՀՔԾ-ն մերժել է քրեական գործ հարուցելը՝ հանցակազմի բացակայության հիմքով:

«Էդմոն Մարուքյանի կողմից իրավունք վերապահող ակնհայտ կեղծ պաշտոնական փաստաթուղթ օգտագործելու և Ոստիկանության անձնագրային ծառայության կողմից օգտագործելու համար իրավունք վերապահող պաշտոնական փաստաթուղթ կեղծելու վերաբերյալ լրատվամիջոցներում տպագրված տեղեկությունների հիման վրա նախապատրաստված նյութերով քրեական գործ հարուցելը մերժվել է՝ նրանց արարքներում հանցակազմի բացակայության հիմքով»,- փոխանցեցին դատախազությունից:

Հիշեցնենք, որ երկու քաղաքական ուժերի միջև առճակատումը սկսվեց նախընտրական քարոզարշավի վերջին օրը տեղի ունեցած հայտնի բանավեճից հետո, երբ Էդմոն Մարուքյանը հարց ուղղեց ԲՀԿ առաջնորդին՝ խնդրելով բացատրել, թե որն է նրա՝ քաղաքականությամբ զբաղվելու մոտիվացիան:

Շողիկ Գալստյան