Քաղաքական ուժերը, այդ թվում՝ ՀՀԿ-ն, ՍԴ-ում ընտրությունների արդյունքները չեն բողոքարկի. երբ տեղի կունենա ԱԺ առաջին նիստը

Արտահերթ խորհրդարանական ընտրությունների մասնակցած 11 քաղաքական ուժերից որևէ մեկը Սահմանադրական դատարանում ընտրությունների արդյունքները բողոքարկելու մտադրություն չունի: Ընտրությունների արդյունքները բողոքարկելու մտադրություն չունի նաև անցողիկ շեմը չհաղթահարած և ընտրությունների ընթացքում ճնշումների և սպառնալիքների մասին ահազանգող Հանրապետական կուսակցությունը, թեև ընտրությունների արդյունքները հայտնի դառնալուց հետո կուսակցությունից հայտարարեցին՝ «արտահերթ ընտրությունները ժողովրդավարական էին ձևով, բայց ոչ բովանդակությամբ»:

Կուսակցության անդամ, նախընտրական շտաբի պետ Դավիթ Հարությունյանը Factor.am-ի հետ զրույցում հակիրճ տեղեկացրեց՝ նպատակահարմար չեն գտնում դիմել Սահմանադրական դատարան: «Քաղաքական ուժերը Սահմանադրական դատարան կարող են դիմել դեկտեմբերի 21-ին մինչև 18:00-ն: Սպասում ենք այդ գործընթացի ավարտին և դրանով պայմանավորված կհայտարարվի նիստի օր»,- Factor.am-ին հայտնեց ԿԸՀ նախագահ Տիգրան Մակուչյանը:

Ըստ «ԱԺ կանոնակարգ» օրենքի՝ Ազգային ժողովի արտահերթ ընտրության դեպքերում առաջին նստաշրջանը հրավիրվում է նորընտիր Ազգային ժողովի կազմավորումից հետո` երկրորդ երկուշաբթի օրը՝ ժամը 10:00-ին, որի մասին հայտարարում է Կենտրոնական ընտրական հանձնաժողովի նախագահը:

Դեկտեմբերի 21-ին, երբ պաշտոնապես արդեն հաստատվի, որ քաղաքական ուժերը ՍԴ դիմելու մտադրություն չունեն, ԿԸՀ-ն ժամանակ կտրամադրի քաղաքական ուժերին ինքնաբացարկի դիմումներ ներկայացնելու համար: «Նախորդ տարվա փորձն ունենալով՝ կարող ենք ասել, որ դեկտեմբերի 21-ից հետո ԿԸՀ-ն հայտարարությամբ հանդես կգա, կտա ինչ-որ ժամկետ և այդ ժամկետը լրանալուց հետո, ձեռնամուխ կլինի անվանական մանդատների տրմանը, իսկ արդեն դրանով պայմանավորված՝ կնշանակվի առաջին նիստի օրը»,- մեզ հետ զրույցում պարզաբանեց «Քաղաքացիական պայմանագիր» կուսակցության վարչության անդամ Վահագն Հովակիմյանը:

Ըստ Հովակիմյանի՝ Ազգային ժողովը կազմավորված է համարվում այն պահից, երբ Կենտրոնական ընտրական հանձնաժողովը հանձնում է անվանական մանդատները, ուստի այդ պահից սկսած երկրորդ երկուշաբթի օրը կգումարվի Ազգային ժողովի առաջին նիստը: «Եթե արագացված ռեժիմով ԿԸՀ-ն ամեն ինչ անի, ապա առաջին նիստը կգումարվի հունվարի 7-ին, բայց եթե ամեն ինչ ընթանա բնականոն ձևով, ապա հունվարի 14-ին: Նաև պետք է հաշվի առնել անցած փորձը, որովհետև իրավակարգավորումները նույնն են», – հավելեց Վահագն Հովակիմյանը:

Եվ այսպես՝ ստացվում է, որ 7-րդ գումարման Ազգային ժողովի առաջին նիստը, ամենայն հավանականությամբ, տեղի կունենա հունվարի 14-ին:

Շողիկ Գալստյան