ՀՀ ԱԳՆ-ում դեռ չեն կարողանում հասկանալ, թե ինչ է նկատի ունեցել Սերգեյ Լավրովը

ՌԴ ԱԳ նախարար Սերգեյ Լավրովն այսօր «Կոմսոմոլսկայա պրավդա»-ին տված հարցազրույցում հայտարարել է, թե Մոսկվան ու Երևանը շուտով փաստաթուղթ են ստորագրելու, որը կերաշխավորի Հայաստանում բիոլաբորատորիաներում օտարերկրյա զինծառայողների բացակայությունը:

Թե ինչ փաստաթղթի մասին է խոսքը, արդեն ժամեր շարունակ մեզ չի հաջողվում պարզել ՀՀ ԱԳՆ-ից, որի խոսնակ Աննա Նաղդալյանը պաբերաբար մեզ պատասխանում է, թե ճշգրտումների կարիք ունի, Լավրովի խոսքը սխալ է հասկացվել, շուտով կտեղեկանան ինչի մասին է խոսքը և պարզաբանում կտարածեն։

Յուրաքանչյուր կես ժամը մեկ արված մեր հեռախոսազանգերից վերջինի ընթացքում էլ տիկին Նաղդալյանն ասաց, թե միջպետական պայմանագրերն ու համաձայնագրերը, եթե դրանք դեռևս մշակման փուլում են, հրապարակման ենթակա չեն: ԱԳՆ խոսնակի խոսքից, սակայն, պարզ դարձավ, որ Հայաստանի արտգործնախարարությունում տեղյակ չեն, թե կոնկրետ ինչ փաստաթղթի մասին է խոսել Լավրովը «Համատեքստից հասկացվում է, որ խոսքը բիոլաբորատորիաների մասին է»,- ասաց Նաղդալյանը՝ հավելելով․ «Հայաստանն իրականացնում է բոլոր միջազգային պարտավորությունները՝ ուղղված բակտերիոլոգիայի ոլորտում գիտական ուսումնասիրությունների խաղաղ կիրառմանը: Ավելին չեմ կարող ասել, թե ինչի մասին է խոսքը»։

Մեր հարցին, թե արդյոք նորմալ է, որ մեկ այլ երկրի արտգործնախարար խոսում է մեր երկրի տարածքում օտարերկրյա զինվորականների մուտքն արգելող փաստաթղթի առաջիկա ստորագրման մասին, իսկ մեր արտգործնախարարությունում փորձում են Լավրովի խոսքերի «համատեքստից հասկանալ», թե ինչ է նա նկատի ունեցել, ի վերջո՝ կա՞ կոնկրետ փաստաթուղթ, թե ոչ՝ ՀՀ ԱԳՆ խոսնակն ընդամենն արձագանքեց․«Նման ինֆորմացիա չեմ կարող տրամադրել»:

Հավելենք, որ հարցի շուրջ փորձեցինք պարզաբանում ստանալ նաև վարչապետի պաշտոնակատարի խոսնակ Արման Եղոյանից ու ՊՆ տեղեկատվության և հասարակայնության հետ կապերի վարչության պետ Գևորգ Ալթունյանից: Երկու գերատեսչությունից էլ առաջարկեցին դիմել արտաքին գործերի նախարարություն՝ պատճառաբանելով, որ խոսքը Ռուսաստանի ԱԳ նախարարի հարցազրույցի մասին է, և ճիշտ կլինի մեկնաբանությունը ստանալ Հայաստանի ԱԳՆ-ից: