29.06.2026 | 13:37
Ինչո՞ւ եք 4 օր անց արձագանքել ժամը 20-ից հետո ընթացող քվեարկություններին․ ՍԴ դատավորը՝ ԿԸՀ նախագահին․ ՏԵՍԱՆՅՈՒԹ
Արմեն Գևորգյանը չկալանավորվեց. ՏԵՍԱՆՅՈՒԹ
Հասարակություն
14.12.2018 | 16:24
Ավան և Նոր Նորք վարչական շրջանների ընդհանուր իրավասության դատարանը քիչ առաջ մերժեց Արմեն Գևորգյանին կալանավորելու միջնորդությունը։
«Այս պահի դրությամբ կայացվել է արդար որոշում՝ այնքանով ինչքանով հաշվի են առնվել մեր փաստարկները։ Բայց դա չի նշանակում, որ գործն ավարտվել է, մենք շարունակելու ենք աշխատել։ Մենք շարունակելու ենք ներկայացնել մեր փաստարկները և մոտեցումները՝ հիմնավորելով մեր անմեղությունը և մեղադրանքի՝ անհիմն լինելը»,- դատարանի դահլիճից դուրս գալուց հետո հայտարարեց Արմեն Գևորգյանը։
ՀՀ նախկին փոխվարչապետն ասաց, որ դասարանում փորձել է ներկայացնել իր անցած ճանապարհը, թե ինչով է զբաղված եղել վերջին 20 տարում Հայաստանի Հանրապետությունում՝ վերադառնալով Ռուսաստանից. «Պատմել եմ, թե ինչ սկզբունքներով եմ կազմակերպել իմ աշխատանքը պետական համակարգում, իմ կարծիքով՝ ինչ օգուտ եմ բերել մեր պետությանը։ Խնդրել եմ դատարանին հաշվի առնել մի քանի հանգամանք, որոնք, ըստ իս, կալանավորման համար հիմք պետք է չդառնան»։
Նա չանդրադարձավ հարցին՝ որքանով ինքը կապ ունի Մարտի 1-ի արյունալի իրադարձությունների հետ, հիշեցրեց, որ դրանցով կան օրինական դատավճիռներ, որով արձանագրված է՝ ով ինչ մեղք է ունեցել Մարտի 1-ին:
«Ինձ համար նույնպես անակնկալ է եղել, երբ 4 ամիս հետո մեղադրանքը փոխվել է՝ հաշվի առնելով, որ օգոստոսի 3-ին արդարադատության իրականացմանը խոչընդոտելու մեղադրանքը ներկայացվել է, արդեն իսկ 1 շաբաթ առաջ սահմանադրական կարգի տապալման մեղադրանքը ուրիշներին ներկայացված է եղել։ Ի՞նչ փոխվեց 4 ամսվա ընթացքում, ես չգիտեմ»,- նշեց Գևորգյանը։
Հարցին, այն որ դատարանն իր նկատմամբ չկիրառեց կալանք, դա չի՞ նշանակում, որ իշխանությունը դատարանի վրա ճնշում չի գործադրել, Արմեն Գևորգյանը պատասխանեց. «Ինձ համար սպասելի էր հետևյալը, որ երեկ դատական քննության ժամանակ բոլոր կողմերը հնարավորություն են ունեցել իրենց բոլոր փաստարկները ներկայացնել։ Ես որևէ կողմնակալություն չեմ տեսել։ Քանի որ նիստն անցկացվել էր անկաշկանդ, բոլոր հնարավորությունները կար, որ դատարանը պաշտպանական կողմի բոլոր արգումենտներն ընդուներ։ Երկրում ստեղծված իրավիճակը շատերին հուշում էր, որ պոտենցիալ կարող էր այլ որոշում լիներ»։
Մանրամասները՝ տեսանյութում:
Ռոբերտ Անանյան
