16.10.2026 | 15:10
Ալեն Սիմոնյանը՝ անկլավների փոխանակման մասին // Արաղչին խոսել է TRIPP-ի հարցով մտահոգություններից․ ԼՈՒՐԵՐ
ԱԲ-ի, կիբեռանվտանգության և թվային փոխակերպման հարցեր են քննարկել Դավիթ Թադևոսյանն ու Համաշխարհային բանկի ներկայացուցիչը
16.10.2026 | 14:41
Բարձր տեխնոլոգիական արդյունաբերության և արհեստական բանականության նախարար Դավիթ Թադևոսյանն ու Համաշխարհային բանկի Հայաստանի գրասենյակի ղեկավար Ֆաբրիցիո Զարկոնեն քննարկել են արհեստական բանականության, կիբեռանվտանգության, հեռահաղորդակցության և պետական տեղեկատվական համակարգերի թվային փոխակերպման ուղղություններով համագործակցության հնարավորությունները։
Նախարարության հաղորդագրությունը՝ ստորև․
«ՀՀ բարձր տեխնոլոգիական արդյունաբերության և արհեստական բանականության նախարար Դավիթ Թադևոսյանն ընդունել է Համաշխարհային բանկի Հայաստանի գրասենյակի ղեկավար Ֆաբրիցիո Զարկոնեին։
Հանդիպման ընթացքում քննարկվել են բարձր տեխնոլոգիական արդյունաբերության, արհեստական բանականության, կիբեռանվտանգության և հեռահաղորդակցության ոլորտներում, ինչպես նաև պետական տեղեկատվական համակարգերի թվային փոխակերպման ուղղությամբ համագործակցության զարգացման հնարավորությունները։
Նախարարը կարևորել է Համաշխարհային բանկի հետ ձևավորված արդյունավետ համագործակցության շարունակականությունն ու խորացումը՝ ընդգծելով Վանաձորի և Գյումրու տեխնոլոգիական կենտրոնների, ինչպես նաև Ինժեներական քաղաքի դերը STEM ուղղության զարգացման գործում։
Դավիթ Թադևոսյանը ներկայացրել է նախարարության առաջնահերթ ծրագրերն ու նախաձեռնությունները՝ անդրադառնալով Արհեստական բանականության գրասենյակի ստեղծմանը, պետական կառավարման արդյունավետության բարձրացման նպատակով ԱԲ գործիքների կիրառմանը, հայերենի համար լեզվային ԱԲ գործիքների ներդրմանը, ինչպես նաև պետական ծառայողների թվային գրագիտության բարձրացմանն ու արհեստական բանականության պատասխանատու կիրառման ապահովմանը։
Անդրադարձ է կատարվել նաև տեխնոլոգիական էկոհամակարգի զարգացման հնարավորություններին, մասնավորապես՝ տեխնոլոգիական ընկերությունների համար համատեղ արտադրական տարածքների ստեղծմանը և ֆինանսավորման գործիքների կիրառմանը։ Ենթակառուցվածքների զարգացման համատեքստում կարևորվել են պետական տեղեկատվական համակարգերը ամպային միջավայր տեղափոխելու և հեռահաղորդակցության ենթակառուցվածքների զարգացման հարցերը։
Ֆաբրիցիո Զարկոնեն բարձր է գնահատել Հայաստանում իրականացվող բարեփոխումների տեմպն ու ծավալները։ Կողմերը պայմանավորվել են շարունակել համագործակցությունը նորարարական և գիտահետազոտական նախաձեռնությունների ու առաջնահերթ ծրագրերի իրականացման ուղղությամբ»։
