02.11.2026 | 22:55
«Ադրբեջանում խոսքի ազատությունն ու անկախ քաղաքական գործունեությունը ճնշվում են». ԵԽԽՎ և ԵԱՀԿ ԽՎ ներկայացուցիչներ
Պատի տակով եկել, գոմ ա մտել, տունը նստած եմ եղել․ Շաքիի բնակչուհի․ ՏԵՍԱՆՅՈՒԹ
Հասարակություն
02.10.2026 | 16:41
Սյունիքի մարզի Սիսիան համայնքի Շաքիի բնակչուհին Factor TV-ին պատմել է, թե ինչպես են ՀՀ պետական սահմանը ապօրինի հատած ադրբեջանցի զինծառայողին իր անասնագոմի տարածքից վնասազերծել։ Նա պատմել է, որ միջադեպի պահին հարևանուհու հետ տանը սուրճ էր խմում և սկզբում չի նկատել, թե ինչպես է զինված ադրբեջանցին մտել իր բակ։
«Սկզբից ես չեմ էլ իմացել, որ եկել ա։ Տանը նստած տեղս երևի էն պատի տակով եկել ա, մտել գոմ։ Դե չմտածեցինք, որ կարող ա մեր գոմը մտած ըլնի։ Հետո, որ ման էին գալիս, երևի արյան հետքերով տեսան՝ եկել, մտել ա գոմ»,- նշեց Արմիկ տատը՝ հավելելով, որ իրավապահներն ու գյուղացիները շատ արագ հավաքվել են իրենց տարածքում, հայտնաբերել և վնասազերծել են ներխուժողին։
Նրա խոսքով՝ ադրբեջանցին տեղի բնակչուհուն կրակելուց հետո խուճապահար փախել է այգիներով ու բանջարանոցներով և փորձել պատսպարվել հին քարե շինության մոտ, որտեղ հետագայում իրավապահները հայտնաբերել են արյան հետքեր։ Դեպքի վայրն այժմ շրջափակված է ոստիկանական ժապավեններով։
Արմիկ տատիկը պատմել է, որ ինքն ապրում է պայմանագրային զինծառայող որդու հետ, ով 15-օրյա հերթափոխով մարտական հենակետերում է ծառայում, և չնայած նախկինում երբևէ վախ չի զգացել, տեղի ունեցած միջադեպից հետո լուրջ անհանգստություն է ապրում։
Նշենք, որ Դատախազությունը տեղեկացրել էր՝ 2026 թվականի հոկտեմբերի 1-ին Սյունիքի մարզի Սիսիան համայնքի Շաքի բնակավայրում արձանագրված դեպքով նախաձեռնվել է քրեական վարույթ՝ զենքի գործադրմամբ առողջությանը ծանր վնաս հասցնելու, հրազենի ապօրինի շրջանառության և բնակարանի անձեռնմխելիությունը խախտելու հատկանիշներով։
Ավելի ուշ ևս մեկ վարույթ է նախաձեռնվել՝ պետական սահմանն ապօրինի հատելու և հրազենի մաքսանենգության հատկանիշներով, որը միացվել է արդեն իսկ առկա վարույթին։ Ադրբեջանցի զինծառայողին կալանավորելու վերաբերյալ միջնորդություն է ներկայացվել դատարան։
Մանրամասները՝ տեսանյութում։
Նարեկ Կիրակոսյան
