06.11.2026 | 01:59
Եվրոպա լիգա. «Արարատ-Արմենիան» ցավալի պարտություն կրեց Պորտուգալիայում. ՏԵՍԱՆՅՈՒԹ
Վերլուծվում է վառելիքի պահեստներում առկա մնացորդների, ներմուծման և իրացման գների վերաբերյալ տվյալները․ Մրցակցության և սպառողների շահերի պաշտպանության հանձնաժողով
Հասարակություն
30.09.2026 | 18:03
Վերջին ամիսներին վառելիքի միջազգային բորսայական գների էական աճի պայմաններում Հայաստանի Հանրապետությունում ևս արձանագրվել է վառելիքի գների բարձրացում։ Մրցակցության և սպառողների շահերի պաշտպանության հանձնաժողովի մամուլի խոսնակ Անի Սմբատյանը Factor.am-ի հետ զրույցում հայտնել է, որ վառելիքի շրջանառության ոլորտը մշտապես գտնվում է հանձնաժողովի ուշադրության կենտրոնում:
«Հանձնաժողովը համապատասխան պետական մարմիններից և ոլորտում գործունեություն իրականացնող տնտեսավարող սուբյեկտներից ամսական պարբերականությամբ ստանում և վերլուծում է վառելիքի շուկայում առկա իրավիճակի վերաբերյալ տեղեկատվություն, այդ թվում՝ վառելիքի պահեստներում առկա մնացորդների, ներմուծման գների և ծավալների, ինքնարժեքի և իրացման գների վերաբերյալ»,- ասաց Սմբատյանը:
Հիշեցնենք, որ վառելիքի գները վերջին շաբաթներին Հայաստանում զգալիորեն աճել են։ Պրեմիում տեսակի բենզինի գինը որոշ լցակայաններում անցել է 620 դրամի շեմը, իսկ ռեգուլյարի գինը՝ 600 դրամը։ Սա այն դեպքում, երբ ամիսներ առաջ պրեմիում տեսակը վաճառվում էր 430-450 դրամ՝ չհատելով անգամ 500 դրամի շեմը։ Միջազգային շուկայում նավթի և նավթամթերքի գների վրա շարունակում են ազդել մատակարարումների խափանումներն ու աշխարհաքաղաքական լարվածությունը։
Անի Թամրազյան
