27.09.2026 | 08:00
ՏԻՄ ընտրությունները մեկնարկեցին հանրապետության չորս համայնքներում
«Տիգրան Մեծ» բնակելի շենքի կառուցապատողը տուգանվել է 15.2 մլն դրամով և պարտավորվել փոխհատուցել բնակիչներին
Հասարակություն
04.09.2026 | 18:00
Մրցակցության և սպառողների շահերի պաշտպանության հանձնաժողովը «Շինաս» ՍՊԸ-ի վարքագիծը սպառողների շահերը խախտող է ճանաչել և ընկերությանը տուգանել 15 մլն 272 հազար դրամով։ Ընկերությունը պարտավորվել է նաև բնակարանների սեփականատերերին փոխհատուցել խոստացված SCHUCO պատուհանների չտեղադրման համար, ապահովել ելք դեպի Մոնթե Մելքոնյան փողոց, ինչպես նաև կատարել անվտանգության և կոնսիերժ ծառայությունների հետ կապված պարտավորությունները։
«Մրցակցության և սպառողների շահերի պաշտպանության հանձնաժողովը տուգանել է Քըրք Քըրքորյան 27/7 հասցեում գտնվող «Տիգրան Մեծ» բնակելի շենքի կառուցապատող «Շինաս» ՍՊԸ-ին։
Մրցակցության և սպառողների շահերի պաշտպանության հանձնաժողովի որոշմամբ՝ սպառողների շահերը խախտող գործելակերպ է որակվել Քըրք Քըրքորյան 27/7 հասցեում գտնվող «Տիգրան Մեծ» բնակելի շենքի կառուցապատող «Շինաս» ՍՊԸ-ի հետևյալ վարքագիծը.
Բնակելի համալիրում SCHUCO ապրանքանիշի պատուհաններ չտեղադրելը։
Դեպի Մոնթե Մելքոնյան փողոց անմիջական ավտոճանապարհային ելք չապահովելը։
Բնակելի համալիրում անվտանգության և 24/7 կոնսիերժ ծառայություններ չապահովելը։
Շենքի բնակարանների փոխանցման ակտերում օրենսդրությանը հակասող դրույթներ նախատեսելը։
Արդյունքում, կատարված խախտման համար «Շինաս» ՍՊԸ-ն տուգանվել է 15 272 000 ՀՀ դրամի չափով։
Բացի այդ, «Շինաս» ՍՊԸ-ին հանձնարարվել է անհապաղ՝
բնակարանների սեփականատերերից յուրաքանչյուրին վճարել իր բնակարանում տեղադրված պատուհանների յուրաքանչյուր 1 քառակուսի մետրի համար 85 757 ՀՀ դրամ,
ապահովել Երևան քաղաքի Քըրք Քըրքորյան 27/7 հասցեից անմիջական ավտոճանապարհային ելք դեպի Մոնթե Մելքոնյան փողոց,
շենքի կառավարման մարմնին փոխանցել շենքի ավարտական ակտի տրամադրման օրվանից՝ 2025 թվականի հոկտեմբերի 7-ից մինչև 2026 թվականի մարտի 9-ն ընկած ժամանակահատվածի համար անվտանգության ծառայության ապահովման արժեքը՝ 589000 ՀՀ դրամ,
ապահովել 24/7 կոնսիերժ ծառայություն ավարտական ակտի տրամադրման պահից՝ 2025 թվականի հոկտեմբերի 7-ից մինչև բնակելի համալիրի կառավարման մարմնի ձևավորման պահն ընկած ժամանակահատվածին համարժեք ժամկետով»,- ասված է հաղորդագրությունում։
