17.10.2026 | 14:04
Հրապարակվել են հոկտեմբերի 25-ին կայանալիք ՏԻՄ ընտրությունների ընտրողների վերջնական ցուցակները
Գագիկ Խաչատրյանը հաշմանդամության կարգ ունի, 24 ժամից ավելի է՝ չի սնվել․ փաստաբան․ ՏԵՍԱՆՅՈՒԹ
Հասարակություն
02.09.2026 | 16:26
Ֆինանսների նախկին նախարար և Պետական եկամուտների կոմիտեի (ՊԵԿ) նախկին նախագահ Գագիկ Խաչատրյանի կալանավորման հետ կապված փաստաբանական խումբն ահազանգում է Խաչատրյանի նկատմամբ ցուցաբերվող անմարդկային վերաբերմունքի և Մարդու իրավունքների եվրոպական կոնվենցիայի կոպտագույն խախտումների մասին: Ըստ պաշտպանների՝ ծանր հիվանդությունների պատճառով մշտական խնամքի կարիք ունեցող անձը 24 ժամից ավելի զրկված է եղել սննդից և տարրական սանիտարահիգիենիկ պայմաններից։
Երեմ Սարգսյանի խոսքով՝ Գագիկ Խաչատրյանին ձերբակալել են սեփական բնակարանից: Նախ տեղափոխել են քննչական մարմին, ներկայացրել մեղադրանքը, ապա տեղափոխել Հակակոռուպցիոն դատարան: Ըստ փաստաբանի՝ մինչև գիշերվա ժամը 3-ի կամ 4-ի սահմանները Խաչատրյանը գտնվել է դատարանում՝ շտապօգնության մեքենայի աշխատակիցների ուղեկցությամբ, պատգարակի վրա պառկած վիճակում:
Պաշտպանական կողմը մի քանի անգամ միջնորդել է նրան տեղափոխել բժշկական հաստատություն և դատական նիստը շարունակել առանց իր ներկայության, սակայն այդ միջնորդությունները մերժվել են:
Ըստ Սարգսյանի՝ առավոտյան ժամը 7:30-ից սկսած, Խաչատրյանը զրկված է եղել սնվելու և սանիտարական հարմարություններից օգտվելու հնարավորությունից:
«Գագիկ Խաչատրյանն ունի հենաշարժողական համակարգի հետ կապված հաշմանդամության կարգ, և նման անձինք պարտադիր պետք է օգտվեն հատուկ սահմանված հարմարություններից և մշտական խնամքի կարիք ունեն, ինչից նա զրկված էր այդ ողջ ընթացքում»,- նշել է փաստաբանը։
Ըստ պաշտպանի՝ սա Եվրոպական կոնվենցիայի 3-րդ հոդվածի ուղղակի խախտում է (անմարդկային կամ նվաստացնող վերաբերմունքի արգելում), իսկ տեղաշարժերի ժամանակ առաջացող սուր ցավերը հավասարազոր են խոշտանգման։
Մանրամասները՝ տեսանյութում։
Եվգենյա Համբարձումյան
