Գագիկ Խաչատրյանը ձերբակալվեց․ ՔԿ

ՀՀ ՊԵԿ նախկին նախագահ Գագիկ Խաչատրյանը ձերբակալվեց։ Այս մասին Factor.am-ին հայտնեց ՔԿ մամուլի քարտուղար Կիմա Ավդալյանը։

Նշենք, որ քիչ առաջ կոմիտեն հայտնեց, որ ՀՀ ՊԵԿ նախկին նախագահ Գագիկ Խաչատրյանի վերաբերյալ նախաձեռնված քրեական վարույթի շրջանակում ձերբակալման որոշում է կայացվել։ Քննչական գործողություններ են իրականացվել նրա և որդու բնակարաններում, ինչպես նաև նրանց հետ փոխկապակցված շուրջ 21 ընկերությունների գրասենյակներում և մասնաճյուղերում։

Թե երբ է նախաձեռնվել քրեական վարույթը, իրավապահ կառույցից չեն հայտնում։

Ուշագրավ է, որ Գագիկ Խաչատրյանի և նրան փոխկապակցված անձանց վերաբերյալ ապօրինի ծագում ունեցող գույքի բռնագանձման գործընթաց է սկսվել դեռևս 2021-2022 թվականներին։ Դատախազության հրապարակած տվյալների համաձայն՝ Խաչատրյանից և նրա հետ փոխկապակցված շուրջ 25 անձանցից պահանջվում է բռնագանձել 210 միավոր անշարժ գույք, որից 60-ը՝ Երևանում, 14 տրանսպորտային միջոց, 33 կազմակերպություններում ունեցած մասնակցություններ, ինչպես նաև ավելի քան 40 միլիարդ դրամ։ Գույքի ցանկում ներառվել էր նաև Խաչատրյանի ընտանիքին պատկանող՝ ԱՄՆ Կալիֆոռնիա նահանգի Լոս Անջելես քաղաքի Հոլմբի Հիլզ թաղամասում գտնվող առանձնատունը։ Դրա բռնագանձման վերաբերյալ ԱՄՆ-ում առանձին դատական գործընթաց էր իրականացվել։ 2024 թվականին ԱՄՆ արդարադատության նախարարությունը հայտնել էր գույքի բռնագանձման վերաբերյալ համաձայնության ձեռքբերման մասին։ Նշենք, որ օգոստոսի 27-ին վարչապետ Նիկոլ Փաշինյանը Factor TV-ի հարցին պատասխանելով նշել էր: «Ո՞նց ա լինում, որ մի հատ խեղճուկրակի բռնում, տանում են քսան տարի նստացնում են, Գագիկ Ծառուկյանն ու Սերժ Սարգսյանը արդարացվում են Հայաստանի դատական համակարգով։ Ո՞նց։ Ձրի՞։ Ոնց ա լինում, որ Գագիկ Խաչատրյանը դատվում ա, դատավորը լկտիաբար էնքան դատը հետաձգում ա, որ ինքը թոշակի գնա, որ էդ ամբողջ իրավական պրոցեսը զրոյանա: Ձրի՞: Լո՞ւրջ եք ասում»:

Արփի Հակոբյան